L’Asambleya francesa reconoixe as ‘luengas rechionals’ y l’amostranza bilingüe en as escuelas

S'apreba l'articlo 27-bis d'o prochecto de lei de reforma d'a escuela sin garra mención t'a immersión lingüistica

Asambleya Nacional francesa (Foto: Vilaweb)

Asambleya Nacional francesa (Foto: Vilaweb)

L’Asambleya Nacional francesa ha aprebau en segunda lectura l’articlo 27-bis d’o prochecto de lei de reforma d’a escuela, que consagra o reconoiximiento adintro d’o sistema educativo estatal d’as clamadas “luengas rechionals” como l’alsaciano, o vasco, o bretón, o catalán, o corso y l’occitano. Ye a primer vegada que una lei explicita de traza esclatera l’amostranza bilingüe d’o francés y as luengas propias de cada territorio en a educación. A de 2005 nomás charraba sobre a posibilidat d’amostrar-las a partir de convenios sinyaus con as rechions.

O nuevo texto lechislativo tamién diz que cal favoreixer ista amostranza y que as familias recibirán información d’as esferents ufiertas t’aprender.

L’articlo, que estió adoptau en primer lectura por l’Asambleya, ha teniu en a segunda arrienda modificacions d’os senadors. Con tot y con ixo, fica en a lei l’amostranza bilingüe, y en o codigo d’educación o reconoiximiento d’istas luengas como elementos d’o “patrimonio de Francia”. Tamién se i explican as unicas dos trazas como se puet fer efectivo ista amostranza d’as luengas y as culturas y en istas mesmas luengas, ubierto a todas las materias de primer y segundo grau.

Manimenos, como ha criticau o diputau bretón de l’UMP Marc Le Fur, no bi ha garra referencia explicita a lo metodo d’a inmersión lingüistica, aplicada por retes d’escuelas asociativas como la Bressola en Catalunya Norte, as Calandretas en Occitania, as Diwan en Bretanya u Seaska en o norte d’Euskal Herria. Por ixo considera que l’articlo aprebau no rematará alportando garra “progreso concreto”.

D’atra man, o conseller rechional occitano David Grosclaude s’ha estimau más de charrar de voto historico y ha quiesto destacar que a lei ye “important t’as luengas” encara que “quedan bells quantos dreitos que conquerir“: “Votando a lei sobre a reforma de l’escuela os diputaus han adoptau un texto que legaliza a la fin l’amostranza bilingüe y que permite a las luengas rechionals dentrar de traza esclatera en a lei. Ye una victoria colectiva. Ha caliu a a presión d’o mundo asociativo, d’os cargos trigaus locals y rechionals, y d’os diputaus y senadors ta fer entender a lo ministro d’Educación que a lei no podeba ignorar todas istas luengas.

 

Fuent: http://www.vilaweb.cat/noticia/4122367/20130606/lassemblea-francesa-reconeix-llengues-regionals-bilinguisme-lescola.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.