L’Audiencia de Barcelona ordena investigar os bombardeus italianos a la ciudat

Un chudgau desestimó a querella d'AltraItalia, pero agora la habrá d'almitir y citar a os militars italianos y a las victimas supervivents

bombardeu barcelonaL’Audiencia de Barcelona ha ordenau a un chudgau d’instrucción que admita a tramite una querella y investigue os bombardeus de l’aviación faixista italiana sobre a ciudat en marzo de 1938. Una asociación d’italianos residents en Barcelona y dos victimas d’os bombardeus presentoron una querella por delitos contra a humanidat contra l’exercito italiano y os militars espanyols que ordenoron o bombardeu continuau d’a población civil, fendo centenars de muertos. A chueza no admitió a querella, pero agora l’Audiencia le ha ordenau que investigue os feitos y cite a os militars italianos y a las victimas supervivients.

En una interlocutoria de 14 pachinas, a sección Decena de l’Audiencia fa referencia a numerosa churisprudencia internacional ta decretar que os crimens de guerra y contra a humanidat no prescriben y pueden estar investigaus siempre que os autors sían vivos. Asinas, remera que entre a guerra d’o 36-39 o Convenio de L’Haya de 1907 yera vichent en l’estau espanyol, que l’heba ratificau y l’heba incorporau a la Constitución d’a Republica de 1932. O convenio viedaba expresament os bombardeus masivos contra a población civil y obchectivos no militars, como por eixemplo lugars, ciudatz u vicos.

Amás, desestima l’argumento d’a machistrada d’o Chudgau d’Instrucción numero 28 de Barcelona que os costes economicos d’o procedimiento serían muit elevaus, mas parando cuenta en que talment os autors son muertos. Seguntes l’Audiencia, ye “inadmisible” que un estau democratico y de dreito deixe d’acazar delitos tant graus “por razons simplament monetaristas”.

“O poder chudicial no puede ni ha de colaborar en a consumación d’un agravio comparativo como iste, soque contrimostrar a firmeza que cal ta atorgar a tutela chudicial efectiva a las victimas”, asevera, remerando que os bombardeus estioron “d’extrema gravedat” y suposan “una d’as pachinas mas negras d’a nuestra historia, no nomás por o numero de victimas, soque por l’ensayo que suposó de mecanismos d’aniquilamiento de población civil”.

Por ixo, considera que no se puede archivar a causa nomás por a probabilidat de que os querellaus sían muertos, y remera que en 2012 morioron personaches relevants como Ito Kimura, incheniero chaponés, Rita Levi, premio Nobel de medicina italiana, y Moisès Broggi, ciruchano catalán, de mas de 100 anyos d’edat.

A querella se menaba mas que mas contra os 21 oficials d’a ‘Squadra Legionaria Balears’, dirichida por o cheneral d’aviación Velardi, que bombardeyó bells vicos muit poblaus de Barcelona, como l’Eixample, d’o 16 a o 18 de marzo de 1938. Tamién se menaba contra o dictador faixista italiano Benito Mussolini y o suyo choven, o conte Galeazzo Ciano, ministro d’Afers Extranchers italiano de 1936 a 1943, totz dos ya muertos.

Os querellants tamién citoron en a querella a o cheneral Francisco Franco y o suyo cunyau y ministro de l’Interior, Ramón Serrano Suñer, por presuntament haber pactau os bombardeus con as autoridatz italianas.

L’Audiencia remera igualment que a Lei d’Amnistía de 1977 y a sentencia d’o Tribunal Supremo absolvendo a o machistrau Baltasar Garzón empachan investigar os delitos politicos y contra a humanidat cometius por espanyols mientres a guerra y o franquismo. Pero no empacha investigar delitos cometius por extranchers, en iste caso italianos, en territorio espanyol u catalán.

Por tot isto, l’Audiencia considera que s’ha d’admitir a tramite a querella y investigar os feitos. Imposa una fianza simbolica d’un euro a os querellants y ordena a o chudgau d’instrucción que averigüe a identidat concreta d’os militars y civils italianos que participoron en os bombardeus, ninviando una comisión rogatoria a o Ministerio d’Esfensa italiano y demandando una Fe de Vida y domicilio de cadagún d’ells a o Ministerio de Chusticia italiano.

Igualment, ufre a os supervivients y a os hereus d’as victimas d’os bombardeus a posibilidat d’emprender accions civils y penals, por o qual demanda a colaboración d’o Fichero Historico d’a Generalitat y d’o Concello de Barcelona. Tamién s’habrán de designar dos peritos historiadors especializaus en os bombardeus italianos en a capital catalana, ta que concreten calendatas, zonas bombardeyadas, densidat de población y numero de victimas. A Generalitat y o Concello tamién se podrán personar como partes perchudicadas.

Si todas istas dilichencias no permiten trobar garra d’os culpables vivos, s’habrá d’archivar a causa.

L’asociación d’italianos de Barcelona, satisfeita.

Por a suya parte, l’asociación Altraitalia, formada por italianos residents en Barcelona y que se presentó como acusación popular, ha considerau “historica” a decisión de l’Audiencia, porque ye a primer vegada que un tribunal almite que se puede aplicar a lechislación internacional sobre crimens de guerra y lesa humanidat a la guerra civil espanyola.

Tamién remera que en o suyo país d’orichen, os concellos han estau a ormino os propulsores d’as demandas penals y civils por os crimens d’as tropas d’ocupación nazis de 1943 a 1945 u chunto a las victimas.

Fuent: http://www.vilaweb.cat/noticia/4076657/20130123/laudiencia-barcelona-ordena-investigar-bombardaments-italiana-ciutat.html

11 Rispuestas a L’Audiencia de Barcelona ordena investigar os bombardeus italianos a la ciudat

  1. Agora ya podeban investigar tamien os bombardeos d’o Baixo Aragon.
    Per cierto, que uno d’os papels de tirada nacional, como ye El Periódico de Aragón, publique un coleccionable sobre l’aragones, en o que se reconoixe a suya identidat, se fa pedagochia, e se fa notoria la suya pertenencia a las luengas romanicas, no ye noticia?

    • Zerina m'en fa

      Talment siga meter-me a on no dengún me clama pero un papel de raso en aragonés como ye Arredol tamién en estié noticia en o suyo diya y yo no remero pas a lo Periodico d’Aragón ninviar-la per denguna parti.

      No digo pas que siga bella cosa normal, pero me se fa que’n ye practica común en o periodismo bislayar lo que fan otris, que no?

  2. Zerina m'en fa

    Vaiga país refitolero, a on no se’n puet rechirar os crimens cuentra la humanidat feitos por os propios espanyols cuentra los suyos paisans y manimenos sí los feitos por foranos a l’orden d’os criminals espanyols.

    A lei d’Amnistía de 1977 tamién concara o dreito internacional ratificau por Espanya. Anque ixo rai ta la Admenistración de Sinchusticia espanyola.

    Ta poder pasar a pachina cal leyer-la en primeras…

  3. Ta Merkava
    No te’n faigas, que ya lo publicará Fuellas, igual como quan publicó que heba naixiu o primer periodico dichital en aragonés… oh wait!

    • Tampoco no leigo Fuellas, no te puedo decir.
      Pero querer amagar as cosas només que per estar feitas en atra grafia(u modelo) no ye guaire honesto. Tanto d’un costau como d’atro. Si queretz fer igual como ells… iste chuego mos matará a totz.

  4. Yes acusando a Arredol de amagar bella cosa por estar feita en atra grafía? Igual habrías de preguntar primero por qué no lo han publicau, no? Muitas atras noticias muito importants (de l’aragonés y de tot) no las han publicadas, ells sabrán porqué…
    Soi de tot d’alcuerdo con tu en que iste chuego nos matará a totz. Ye penible que Fuellas no publique garra cosa de tot lo que se fa en grafía de l’academia y que s’amarguine a la chent que la fa servir. Igual que ye penible que Arredol faiga lo mesmo con los que fan servir a grafía d’o 87. Oh wait one more time!

    http://www.arredol.com/chuse-inazio-nabarro-presento-o-suyo-nuevo-libro-mesaches/
    http://www.arredol.com/prencipian-os-cursos-daragones-en-uesca-y-zaragoza/
    http://www.arredol.com/ueitena-edicion-de-luenga-de-fumo-en-uesca/
    http://www.arredol.com/gara-dedizions-presenta-a-gollada-do-bosque-de-chesus-yuste/

    y mesmo meten textos en grafía d’o 87 (http://www.arredol.com/o-mundo-de-laragones-debant-da-nueva-lei-de-no-luengas/)

    http://www.arredol.com/nueva-web-da-comarca-de-lalto-galligo-con-contenius-en-aragones/

    … por meter-ne bellas quantas

    • No, no acuso a Arredol d’ixo. Mira-te o mensache d’as 11:25 e dispués me dices si pregunto per grafias u per qué pregunto.
      Ni en ixe ni en atros mensaches de yo a grafia yera o tema primordial, o primordial pa yo ye a honestidat. Si pa tu vale que “Arredol” no publique cosas con a sincusa d'”ells sabrán porqué” deberias pensar, u atorgar tamién a la chent que fa Fuellas o mismo valor, u a mesma sincusa. Tot isto basando-se en a democracia lingüistica aragonesa, normativizadera e ortografica.
      Sobre amarguinar a la chent, estoi que un buen numero de miembros de l’Academia encara son miembros de Consello, con preguntar perque son amarguinaus en una “asambleya” s’apanya o tema.
      Continará…

  5. Dende Arredol nomás que una cosa. Arredol somos una colla de presonas chicota que preba de fer o mas que puede por fer un meyo de comunicación alto u baxo creyible y completo. Como ye de dar, como somos poquetz, no adubimos a tot, sisquiá tenemos una redacción y teletriballamos.

    No prebo de chustificar cosa, publicamos cadagún as cosas que podemos y quan que podemos. En iste caso, como en tantas atras cosas que no publicamos u sí publicamos, no ha estau por garra historia con as grafías. Y por ixo mesmo tenemos un vinclo que ditz (ninvianos as tuyas noticias: http://www.arredol.com/ninvia-nos-as-tuyas-noticias/) an que podetz ninviar as noticias que creyetz que habriamos de publicar y tal como i plegan, gosamos de publicar-las. Asinas que tos convidamos a ixo, a colaborar con nusatros ta plegar a quantas más cosas millor.

    🙂

    • Ok.
      Bien contestau e sin dobles sentius, ni foscas intincions como quereban fer veyer.
      Una pena que no s’aduba a tot dende o treballo altruista.
      Salut!

  6. Zerina m'en fa

    Sotz buena chent, Arredol, plantaz fuerte!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.