L’Audiencia Nacional archiva a causa contra a familia Botín por fraude fiscal

Se les acusaba d'evadir entre 6000 y 8000 millons d'euros

L’Audiencia Nacional ha archivau a causa ubierta contra o president d’o Banco de Santander, Emilio Botín, y diversos familiars suyos, por un presunto fraude fiscal a la luz d’a regularización que practicoron debant l’Achencia Tributaria que ‘investiga a 659 contribuyents (2 personas churidicas y 657 fisicas) que teneban más de 3000 cuentas en Suiza, a on que podría haber-ie entre 6.000 y 8.000 millons d’euros.

A familia heba evadiu o pago d’impuestos con ‘cuentas foscas’ en Suiza dica que recibió en 2010 un requerimiento de Ficienda (avisada por as autoridatz francesas). O banquero y a suya parentalla dicioron alavez haber salau as suyas cuentas con o fisco dimpués de pagar bells 200 millons d’euros.

‘A regularización practicada por os denunciants se puet considerar correcta y anterior a que se hese incoau un procedimiento d’inspección u de verificación’, afirma o chuez Fernando Andreu en l’acto dictau o pasau martes.

Alavez, considera que en iste caso, no tien responsabilidat a familia d’o financier, en aplicación de l’articlo 305.4 d’o Codigo Penal (que estableix que ‘quedará exento de responsabilidat penal qui regularice a suya situación tributaria’).

Os feitos denunciaus se remontan a mayo de 2010, quan as autoridatz francesas informoron a l’Achencia Tributaria espanyola sobre una serie de personas con fundos en cuentas d’o banco suizo Private Bank Suisse.

Entre istas personas bi yeran dotze miembros d’a familia Botín, Emilio Botín y os suyos cinco fillos -entre ells Ana Patricia-, o suyo chirmán Jaume y os suyos atros cinco descendients. Se les acusaba de no haber presentau as autoliquidacions de l’IRPF y de l’impuesto sobre o patrimonio entre 2005 y 2009.

A demanda de l’Achencia Tributaria os 12 miembros d’a familia Botin procedioron a regularizar a suya situación fiscal presentando declaracions complementarias con as rentas que’n yeran titulars ‘trust, fundacions y atras figuras fiduiciarias’ vincladas a ells.

Debant a incapacidat de verificar en o suyo inte que as regularizacions yeran correctas, y ta evitar que os delitos correspondients a 2005 prescribisen, a Fiscalía Anticorrupción decidió de presentar denuncias contra os Botín.

Con tot y con ixo, se comprometioron a archivar as actuacions si comprebaba que as regularizacions practicadas yeran ‘completas y veritables’, como a la fin ha pasau.

O caso HSBC se orichinó quan un extreballador d’o banco entregó documentación confidencial a las autoridatz francesas de presuntos evasors fiscals.

Fuent: http://noticies.sirius.cat/2012/05/lan-arxiva-la-causa-contra-la-familia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.