L’Audiencia Nacional empacha que cients de convenios caduquen automaticament

A Sala d'o Social considera que a reforma laboral no puede marcar a caducidat de totz os convenios que estasen bloquiaus o 8 de chuliol

400px-Fátima_Báñez_(2011)

A ministra d’Emplego Fátima Báñez. Foto: http://www.empleo.gob.es/index.htm

L’Audiencia Nacional espanyola plega de dirimir un d’os aspectos mas polemicos y compleixos d’a reforma laboral: o que concierne a la vichencia d’os convenios colectivos y que fació caducar mils d’acuerdos que yeran bloquiaus o pasau 8 de chuliol. Manimenos, a Sala d’o Social considera agora que os convenios sinyaus antes d’a entrada en vigor d’a reforma laboral pueden conservar a suya vichencia y que ixa caducidat no puede aplicar-se de forma cheneral a totz os acuerdos.

Dica a entrada en vigor d’a reforma laboral, totz os convenios colectivos manteneban a suya vichencia mientres se’n negociaba uno nuevo. A reforma laboral cambió iste prencipio y establió que aquells convenios que, tot entrando en vigor a norma, estasen bloquiaus (ye decir, ya estasen difuera d’o suyo plazo temporal y que a suya negociación estase entrascada) teneban como maximo un anyo pa renovar-se. De no estar asinas, caducarían,a no estar que o convenio incluise un pacto en contrario entre os representants sindicals y a interpresa. Ixe plazo se cumplió o pasau 8 de chuliol.

En a suya primer sentencia sobre a vichencia d’os convenios colectivos dimpués d’a entrada en vigor d’a nueva norma laboral, que analisa una demanda d’o sindicato de pilotos SEPLA contra l’aerolinia Air Nostrum, os chueces entienden que o periodo d’un anyo de vichencia d’os convenios no puede aplicar-se de forma inflexible. A sentencia sinyala que o limite a la ultraactividat (a vichencia indefinida d’os convenios) no puede estar inflexible ni imperativo pa totz os casos.

“A Sala considera que a respuesta a iste problema exiche un apego a o caso concreto, ya que no pareixe razonable ni churidicament realista mantener que totz os convenios denunciaus antes d’a reforma han finalizau a suya vichencia o 8 de chuliol de 2013, sin garra matiz (puesto que no ye ixo o que diz o lechislador), ni tampoco que totz perviven como si pon no hese cambiau en a regulación legal”, diz a sentencia. Ye decir, que caldrá decidir caso por caso en función d’as suyas peculiraridatz.

A Sala d’o Social concede gran importancia a o conteniu d’o convenio colectivo que os pilotos y Air Nostrum manteneban. En ell, as partes s’heban compromeso a que o convenio actual remaniría vichent dica que se’n negociase uno nuevo. As negociacions pa un nuevo acuerdo levaban meses entrascadas y a interpresa heba manifestau a suya intención de deixar caducar o convenio una vegada plegase o 8 de chulio y substituir-lo por una declaración unilateral. O Sepla interpuso una demanda de conflicto colectivo porque consideraba que ixa decisión vulneraba o pautau en l’anterior convenio.

A Sala d’o Social da a razón a os pilotos: interpreta que ixa voluntat que expresoron as partes que o convenio remanise vichent entre que n’i hese uno nuevo valida que as condicions laborals sigan en piet dimpués d’o 8 de chuliol. Diz tamién que ya ta par d’alavez as partes podrían haber establiu un limite a la vichencia y, manimenos, optaron por no fer-lo. “A posibilidat de limitar a ultraactividat a un anyo siempre ha estau disponible pa las partes, y trigoron no establir-la, por o que malament puede decir-se que no yera a suya voluntat desplazar o rechimen d’ultraactividat anyal que o lechislador agora proposa”, sinyala a resolución.

Os machistraus subrayan a existencia de qualques elementos que “apuntalan a reconoixencia de validez d’os pactos previos” y ninvian un mensache a o Gubierno: “Atra cosa ye que en a practica, dada a gran cantidat de convenios previos a la reforma, o cambeo lechislativo pierda fuerza. Pero tal consideración competiba a o lechislador a la hora de disenyar a norma y hemos de presumir que estió sopesada“.

Fuent: http://www.eldiario.es/economia/Audiencia-Nacional-vigencia-convenios-colectivos_0_157134822.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.