L’augua radiactiva de Fukushima se ye filtrando a o mar y a la tierra

L'augua radiactiva que encara ye en a central nucleyar de Fukushima se ye filtrando cada vegada mas a tierra y mar

fuga fukushimaL’Autoridat de Regulación Nucleyar de Chapón (NRA) ha indicau iste mierques que tien a “firme sospeita” que l’augua altament radiactiva que se concentra en l’accidentada central nucleyar de Fukushima se ye filtrando a tierra y a o mar debant d’a planta. En os zaguers días os livels de concentración de cesio y estroncio radiactivos en muestras d’auguas subterranias “s’han disparau”. L’augua contaminada s’incrementa diariament.

“Hemos de trobar a causa que i hai dezaga d’istes altos livels de contaminación y establir as midas prioritarias pa solucionar-lo”, ha dito o president d’o NRA, Shunichi Tanaka, en l’achencia Kyodo.

L’augua contaminada s’incrementa diariament

En istes momentos, o prencipal reto pa desmantelar a central ye l’acumulación d’augua contaminada en o subsuelo d’os edificios que aloixan os reactors nucleyars, liquido que s’incrementa cada día por as filtracions d’o sistema de refricheración y d’augua subterrania provenient d’as zonas amanadas.

Encara que por agora se desconoixen as causas de l’incremento substancial d’os livels de contaminación d’ista augua, a companyía considera que o foco puede estar un pozo chunto a o mar. Manimenos, a NRA considera que iste puede no estar l’unico orichen d’istes livels.

As muestras d’augua subterrania analisadas o martes en a operadora d’a central, Tokio Electric Power (TEPCO), rechistroron livels de materials radiactivos dica 100 vegadas mas alteros que no yeran en as prebas realizadas o pasau viernes.

A muestra conteneba 11.000 becquerels de cesio-134 por litro y 22.000 becquerels de cesio-137 por litro. En ista augua i heba 900.000 becquerels d’atras substancias que emiten radiación beta, como o estroncio.

TEPCO ha adoptau midas pa sellar ista augua contaminada en zonas d’a central, encara que seguntes o NRA a interpresa no puede controlar a propagación de totz os materials contaminaus en o mar u en tierra. A electrica -que mintió y falseyó os datos dende o prencipio d’a crisi con a complicidat d’o gubierno- afirma que por agora no ha detectau “un impacto significativo” en l’entorno.

Fuent: http://noticies.sirius.cat/2013/07/laigua-radioactiva-de-fukushima-sesta.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.