L’AV Venecia protesta por a eliminación d’os murals vecinals por parte d’o Concello

O Concello de Zaragoza borra bells murals en a Pza. d'o Laurelero en o vico de Torrero, que iste verano i estioron pintaus por diferents vecins y asociacions

Un d’os murals borraus. Foto: AV Venecia

Iste lunes, 19 de noviembre, s’informaba a traviés d’una nota de l’Asociación Vecinal de Venecia – Monts de Torrero que o Concello de Zaragoza borró os murals en a plaza d’o Laurelero de Torrero. Istos murals heban estau realizaus por os y as vecinas d’o vico “ta dignificar y recuperar iste espacio albandonau y en desidia por o Concello y institucions penitenciarias” en parolas d’a vecinal.

L’AV Venecia ha expresau, en una nota de prensa, o suyo malestar por iste suceso: “En razzia vandalica, estioron eliminaus totz aquells que seguntes as autoridatz teneban un conteniu politico u social. Asinas o mural realizau por ninas y ninos d’o vico `No a o rescate d’a bankia´ estió borrau. Tamién l’icono d’o bucardo, especie acotolada d’as nuestras montanyas, que quan encara sobreviviba en o Pirineu central se vió diezmada por as miserables accions cinecheticas d’a monarquía. Se levoron tamién por debant un poliu mural realizau en spray referiu a o terrorismo de consumo que padeixemos. O mesmo facioron con o mural bicolor en solidaridat con quantos presos ecolochistas y libertarios, con una pintada antifaixista y por fin, con o mural d’a `Daria d’o pueblo´, que conteneba l’escudo d’o Consello d’Aragón, zaguera forma de gubierno lechitima y etica que hemos teniu en iste territorio, pues o que ha veniu dimpués no ye soque herencio faixista, u qué?”.

Como dimpués de zarrar Kalegorria, Egunkaria, Ardibeltza y muitos mas meyos de prensa escrita, con pinyoras a El Jueves por referencias a la Casa Reyal, a privación de distribuyir libros y documentación referents a las torturas en l’Estau espanyol, con a reforma d’o Codigo Penal que afoga as libertatz d’expresión, información y manisfestación, con os meyos de des-información en mans d’a bankia, multinacionals y as familias facciosas de siempre, con a censura imposada en o ret, con ordenanzas municipals restrictivas respective a la libre expresión ciudadana… con tot isto dencima… os murals d’a plaza d’o Laurelero yeran un refleixo supervivient d’a expresión d’as ideyas d’o vico, y amás yeran bien polius. Teneban y tienen, ta muitas y muitos una gran valor”, denuncian dende l’AV Venecia.

“Afortunadament, os refleixos d’o vico son rapedos, y quantas personas a qui agradeixemos a suya acción, tenioron a buena voluntat de tornar a quitar a la luz os murals con augua y escobón. Gracias a qui estase!”, adhiben.

Ista asociación remata dicindo: “No podrán callar a o pueblo. O sentir d’o pueblo, d’os vicos, d’a chent… no ye o que vocian as televisions, ye o  que sientes en a voz d’as y os companyers, ye o que chilan os muros, y dengún no lo podrá borrar. A daria d’o Pueblo s’amana!!”.

Fuent: http://arainfo.org/2012/11/la-av-venecia-protesta-por-la-eliminacion-de-los-murales-vecinales-por-parte-del-ayuntamiento/

Una rispuesta a L’AV Venecia protesta por a eliminación d’os murals vecinals por parte d’o Concello

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.