Lee Perry cabeza de cartel d’o Slap! 2013

Un ixambre d'artistas de mosica afroamericana entre os que destaca Lee Perry, ferá sonar a suya mosica en una nueva edición d'o Slap! Festival

Lee "Scratch" Perry. Foto: Marco Annunziata (CC-BY)

Lee “Scratch” Perry. Foto: Marco Annunziata (CC-BY)

A capital aragonesa acullirá os venients 13, 14 y 15 de setiembre a cita mosical afroamericana mas important d’Aragón. O cartel d’artistas d’ista quartena edición d’o Soul Live Afro Party, mas conoixiu como Slap! Festival, se zarró o chunyo pasau. Tot un recorriu por os diferents cheneros de mosica negra que se celebrará en o Camping Ciudat de Zaragoza.

L’elenco d’artistas que compone ista nueva edición confirma a buena salut d’iste festival, que creixe anyo sin atro, incorporando a primeras figuras de l’anvista internacional y importants novedatz en a programación y infrastructura. O scenario prencipal se treslada a un autentico anfiteatro de hierba natural, con mayor capacidat, a on os conciertos serán a l’aire libre pa desfrutar encara mas d’o esprito de “acampada” entre tot o cabo de semana. Asinas mesmo, s’adhiben dos espacios nuevos, l’After Soul, adedicau a sesions dj dimpués de cada concierto, y a Pista Electronica, a on se desfrutarán entre o día y de vez campionatos de baloncesto 3×3 y mosica d’un nuevo chenero que s’incorpora, a electronica. Mesmo os mas chicotz tendrán cullida en l’achenda, ya que i habrá actividatz infantils especialment disenyadas pa desfrutar de momentos en familia a traviés d’a musicoterapia.

Asinas se pretende de consolidar definitivament ista cita dimpués de l’exito d’o pasau anyo, por a on pasoron mas de 1.500 asistents dende Aragón u atros puntos d’o Estau, como dende o Estau francés, Alemanya u Italia. A clau sigue estando a mesma, un cartel mosical y cultural immillorable enmarcau dentro d’un scenario idilico, un camping urbano, una bombolla de naturaleza dentro d’a propia ciudat pa abandonar-se y grondiar-se entre tot un cabo de semana.

Mas de trenta horas de mosica y catorce bandas distintas que recorrerán totz os matices d’a mosica negra, ista vegada de tot representada, mesmo os estilos mas peculiars. Y ye que o cartel d’iste anyo “ha suposau un significativo paso ta debant”, seguntes parolas d’o propio Víctor Domínguez, director d’ista cita, considerada ya como l’evento de mosica y cultura afroamericana mas important d’a peninsula.

Asinas, mientres tot un cabo de semana a ciudat de Zaragoza se veyerá impregnada d’o swing, jazz, R&B, soul, hip-hop, afrobeat y totz os ritmos que abraza a mosica negra, un estilo que ha estau reconoixiu como patrimonio d’a humanidat. Una cita que va dillá d’una trobada mosical, ya que iste festival ye concebiu pa exhibir a diversidat cultural que constituye a identidat d’Africa y a suya influencia en o desembolique mosical y cultural actual, a nivel global y tamién d’Aragón. Por ixa razón, s’ha treballau en componer un cartel eclectico que estase capable d’amanar iste chenero a totz os publicos.

O cartel

Y que millor modo que contando con a presencia como cabeza de cartel de Lee “Scratch” Perry, pionero y una d’as leyendas vivas d’o reggae, considerau por a revista Rolling Stone como un d’os cient millors mosicos de totz os tiempos. Acompanyando-le-ie, atros internacionals como o suyo gran desciplo Mad Professor (Guyana) y Juan Rozoff, l’artista funk mas influyent d’o Estau francés.

Amás por o festival pasarán os sevillanos Pony Bravo, os reis d’o boogaloo, Los Fulanos u a banda barcelonesa Los Mambo Jambo y a suyo mezcla explosiva de rock&roll y rhythm&blues incendiario d’os anyos 50 y 60. Destaca tamién Ben Gunn Mento Band, banda de mento, un chenero tradicional de mosica de Chamaica precursor d’o ska y d’o reggae. Y por o que fa a os dj´s, amás d’os incondicionals Pendejo, serán Los hermanos Pizarro (d’o programa Melodías Pizarras de Radio 3) u Ramón Santana pa os amants d’os platos.

Y prou que, artistas aragoneses como Licor de Pájaro, banda uescana en plena prochección, os zaragozanos Los Inspectores y Celia Carballo, una d’as millors voces d’o jazz, escoltada por The Black Tones. Y ye que iste festival tamién tien como obchectivo promover a producción mosical aragonesa y refirmar a artistas emerchents d’a scena local, fendo honra o festival como escaparate.

Mosica a l’aire libre, de días y de nueitz, baixo una carpa u descalzos sobre a hierba, adormindo en tienda de campanya u en bungalow, clases de swing, actividatz infantils, mercadet, campionatos de baloncesto u capuzons en a piscina,… tot isto y muito mas pa desfrutar en familia u con amigos en un entorno privilechiau, os 77.000 m2 d’o camping municipal de Zaragoza.

Unatra d’as valors adhibidas d’o Slap! ye a suya sostenibilidat, ya que dende os suyos prencipios ha achugau por un pre asequible a todas as pochas y edatz. Dende 10 euros a entrada de días dica abono de tres con acampada libre por solament 35 euros, estando gratuito pa menors de 14 anyos. Tot ixo disponible en a web www.slapfestival.com u www.desafinadoproducciones.com y atros establimientos d’a ciudat como Desafinado Café, Shuave Shop, El Zorro y Camping Municipal de Zaragoza.

Fuent: http://arainfo.org/2013/09/lee-perry-cabeza-de-cartel-del-slap-2013/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.