L’EFA publica en linia la Gramatica Basica de l’Aragonés

La entidat presenta en a suya web la Gramatica Basica, una obra fundamental pa lo conoiximiento de l'aragonés.

Lo Estudio de Filolochía Aragonesa (EFA) acaba de presentar, a través d’a suya editorial, EDACAR, lo suyo segundo treballo lingüistico de gran alcanz: La Gramatica Basica de l’Aragonés, que puede consultar-se en linia. Dimpués d’a suya creación en o 2006 -como resultau d’o II Congreso de l’Aragonés-  y d’a presentacion d’a Propuesta Ortografica de l’Academia de l’Aragonés en 2010, lo colectivo de filologos y especialistas integraus en l’EFA difunde agora un minucioso y valioso treballo sobre la nuestra luenga.

Portalada d’a Gramatica Basica de l’Aragonés.
Punchar en a imachen pa acceder a lo conteniu.

Una comisión formada por dotze miembros de l’EFA ha estau adedicada durante tres anyos consecutivos a treballar en iste documento, de quasi quatrocientas pachinas. Se tracta d’una obra de referencia de caracter cheneral y basico, que describe, ordena y prioriza lo material lingüistico conoixiu d’as suyas variedatz, en un marco de continidat con a luenga aragonesa historica. Seguntes indica la introducción, lo treballo no preba de describir l’aragonés standard, encara en formación, sino que mira d’estar un texto sistematizau que permita a los parladors de cada variedat identificar-se con a suya propia parla y plazar-la en o conchunto global d’o sistema lingüistico aragonés, usando la gramatica como ferramienta pa enriquir la propia luenga y adaptar-la a las necesidatz comunicativas con atros parladors d’aragonés.

En iste sentiu la Gramatica Basica de l’Aragonés aconsella u desaconsella determinaus usos en os rechistros mas formals d’a luenga.  Tampoco no ye un manual d’aprendizache de l’aragonés, sino que ye pensada pa los charradors nativos u pa qui l’haigan aprendiu como segunda luenga.
La edición que presenta agora la entidat creada por lo II Congreso de l’Aragonés ye una edición provisional, pa un periodo de bells meses, en os quals l’EFA replegará las observacions de qui se sienta afectau u interesau por la luenga aragonesa.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.