L’estau francés anuncia una reforma constitucional pa dar mas poders “a las rechions”

A reforma incluiriá poders lechislativos y a ratificacion d'a Carta Europea d'as Luengas Rechionals u Minoritarias

Jean-Marc Ayrault. Foto: http://www.flickr.com/photos/jmayrault/ (CC-BY)

Jean-Marc Ayrault. Foto: http://www.flickr.com/photos/jmayrault/ (CC-BY)

O primer ministro Jean-Marc Ayrault anunció o viernes, dende Roazhon en Bretanya, que en o venient abril, o Gubierno francés presentará un prochecto de descentralización d’o estau incluindo, entre diversas midas, dar una marguin de maniobra lechislativa a las rechions (actualment nomás Corcega en tiene) amás de ratificar a Carta Europea d’as Luengas Rechionals u Minoritarias. O estau reacciona asinas a o movimiento bretón d’as “barretinas royas” que ha anunciau a convocatoria d’un parlamento breton con estaus chenerals en o mes de febrero. A ratificación d’a Carta Europea d’as Luengas Rechionals u Minoritarias obligaría a reformar a constitución francesa.

En un cenyo muit inhabitual, Jean-Marc Ayrault ha dito qualques frases en bretón antes de sinyar o dito Pacto por o Futuro de Bretanya. Y encara que no s’ha aclariu guaire o conteniu d’a reforma constitucional, sí que ha dito que as competencias d’a cultura deberían d’estar dentro d’as rechions con luenga propia.

L’anuncio d’Ayrault contrasta con as zagueras posicions d’o president François Hollande y d’o ministro de l’Interior Manuel Valls, que s’amostraban desfavorables a una reconoixencia d’as luengas minorizadas.

Seguntes informacions de Le Monde, o grupo PS de l’Asamblea Nacional podría empecipiar un debat sobre una lei constitucional dende chinero de 2014.

En o caso d’Occitania, ista reforma puede meter a pregunta de saber cómo coordinar as nueu rechions oficials que cubren a luenga d’oc (Peitau-Charantas, Centro, Lemosín, Auvernia, Ròse-Alpes, Provenza, Languedoc-Rosselló, Meyodía-Perineus, Aquitania).

Fuent: http://www.jornalet.com/nova/2777/lestat-frances-anoncia-una-reforma-constitucionala-per-donar-mai-de-poders-a-las-regions

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.