L’Eurogrupo recula y s’ubre a no castigar a los chiquetz cabidadors de Chipre

Fuents comunitarias aseguran que a zaguer ufierta ye imposar una tasa d'o 15,6% a totz os despositos por dencima de 100.000 euros ta guaranciar l'obchectivo de replega de diners

A presidenta de Alemanya y o president de Chipre en 2007 (Foto: Wikipedia)

A presidenta de Alemanya y o president de Chipre (Foto: Wikipedia)

Errare humanum est, pero l’empandullo ya ye feito en a zona euro y será dificil superar l’ixorronte. Tot apunta a que l’Eurogrupo ha acceptau achiquir o castigo t’os chiquetz cabidadors chipriotas y que recula en a suya primer decisión de autorizar una saca d’impuestos por debaixo d’os 100.000 euros u, a lo menos, s’ubre a sacar-la. En un comunicau feito en a nueit d’o lunes dimpués d’a reunión por videoconferencia que tenioron os ministros de Finanzas, a institución asegura que se “reafirma en a importancia de guaranciar os depositos por debaixo d’os 100.000 euros” y deixa en mans de Chipre a reformulación d’a polemica mida.

A troika (o trío formau por o Banco Central Europeu, Bruselas y o Fundo Monetario Internacional), heba pactau en a maitinada d’o sabado imposar a los chicotz cabidadors d’o país mediterranio una “tasa especial” d’o 6,7 % sobre os depositos de menos de 100.000 euros y una d’o 9,9% a partir d’ixa cantidat. Dica agora, garra país rescatau heba tocau os diners cabidaus por debaixo d’ista muga, considerada sagrada ta salvar d’a crisi a los chiquet depositants y alzar asinas a confitanza en o sistema de man d’os ciudadans. Expertos de tot lo mundo criticoron de camín ista mida, que creya un precedent muito perigloso en l’euro, ya que atros estaus en situacions dificials, como Italia u Espanya, pueden viyer como se sacan capitals d’os bancos suyos.

En un ambiguo comunicau, l’Eurogrupo diz agora que da vía libre a las autoridatz chipriotas ta ficar “más progresividat” en o impuesto “en comparando” con lo que s’alcordó en a zaguer reunión. En o texto, os ministros de l’euro no “se mullan” con o disenyo d’o clamau impuesto, o nombre con que ha clamau Bruselas a mida confiscatoria. Pero se insiste en que entiende que os chicotz depositants han d’estar tractaus de traza esferent que no as gran fortunas. A redacción pareix deixar as mans libres a Nicosia ta que disenye o impuesto como veiga millor ta que s’aprebe en o Parlamento.

Fuents comunitarias aseguroron ahiere a los periodistas destinaus en Bruselas que a zaguer ufierta sobre la mesa pasaba por imposar una tasa unica de dica o 15,6% a los depositos que puyaban d’a cifra d’os 100.000 euros. D’atra man, os meyos chipriotas deciban anueit que a unica parti exenta sería la d’os depositos de menos de 20.000 euros lo que aduyaría a tener a salvo os diners cabidaus d’os chipriotas que se crei que son más que más en ixe trampo.

A unica exichencia d’os ministros de l’euro ye que a tasa final cubra la factura de 5.800 millons d’euros, sin rebaixar un euro l’obchectivo. Con tot y con ixo, istas nuevas condicions podrían cambiar porque encara continan as negociacions y contina en marcha o tramite parlamentario en Nicosia. A parti que asume o fundo de rescate d’a UE será de 10.000 millons d’euros.

Os ministros de l’euro refirman o “corralet” imposau por o Gubierno de Chipre. Os bancos remanirán zarraus como minimo dica o chueves. L’eurogrupo aplaude a mida porque considera que permitirá guaranciar a “estabilidat d’o sector financier”.

D’atra man, urche a lo Parlamento Chipriota a plegar en bell alcuerdo ta prencipiar a fer as midas pautadas. A votación parlamentaria se ha rezagau dica iste martes debant d’a posibilidat de renegociar as condicions de l’achuste con a UE asinas como por a dificultat d’o president Nicos Anastasiades de recibir o refirme parlamentario que le cal.

 

Fuent: http://www.eldiario.es/economia/Eurogrupo-castigo-pequenos-ahorradores-chipriotas_0_112339312.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.