Liberada un alica perdicera en os monts de Zuera

Ye parti d'un programa de recuperación

O pollo, que se trobó en un niedo de Uesca muito malaudo, ha pasau por un proceso de recuperación en o CIAMA – L’Alfranca ta deixar-la en libertat en as instalacions militars de Sant Gregorio, en a parti d’os monts de Zuera que se cremoron en o estiu de 2008.

L’alica, que agora tien ueito meses de edat, se trobó en os primers diyas d’a vida suya en un niedo en a provincia de Uesca con una malotía que le feba mal en o garganchón y no le deixaba trusquir. “Si no la trobamos, s’hese muerto de fambre, igual como lo suyo chirmán”, ha dito Chabier, un d’os albeitars que ha tractau a iste masclo mientres os siete meses que s’ha estau en o CIAMA – L’Alfranca. Entre que yera en cautividat, antimás de curar-le s’ha estau bellas semanas en o parque de vuelo, a on ha aprendiu a cazar as codornices que le soltaban ta poder apanyar-se solo.

Agora que ya he pretau a volar, será controlau mientres as quatre anyadas venients por un completo sistema GPS que localiza en cada inte a on se troba. Iste aparato, que va apegau en a espalda, se cayerá en bellas anyadas, quan l’arnés que lo porta s’esfaiga con o pasar d’o tiempo. Sobre o suyo futuro, os especialistas no saben si trobará parella en Aragón u marchará luen. “Muitas rematan en Andalucía, que bi ha una gran colonia”, ha comentau un d’os tecnicos que colabora con o CIAMA- L’Alfranca.

En soltando iste exemplar o Gubierno ha quiesto simbolizar o escompencipie d’o Plan de Recuperación de l’alica perdicera, aprobau o pasau martes en o Consello de Gubierno. En iste sentiu, Munilla ha manifestau que con ista mena d’actuacions “se mira de deixar un legau”. Tamién ha considerau que ye important “sensibilizar” a la población en a protección d’as especies.

D’a mesma traza, a triga d’o puesto a on soltar-la no ha estau arbitraria, ya que en os monts de Zuera a on son as instalacions militars de Sant Gregorio, bi habió un gran incendio en estiu de 2008 que cremó arrienda hectareas. Hue, quan ya son pasadas tres anyadas, a esferra encara ye un chandrío de tot, pero bells chitos prencipian a surtir. “Ye a traza de recuperar a fauna d’una redolada que estió muito perchudicada”, ha indicau o coronel Lobo – chefe d’o campo de maniobras-, qui ha sinyalau que a redolada d’ha esleixiu “es estar de especial protección t’as aus en estar viedada a caza”, ha dito o militar.

A especie, que en Aragón ye en periglo d’acotolar-se, tien l’aición de l’hombre como un d’os mas grans factors de risque.  De feito, en a zaguer anyada han apareixiu muertos siete eixemplars de alica perdicera: dos electrocutaus, dos enverenaus y tres con tiros.

Y ye que, como han esplicau bells d’os tecnicos que han visto a suelta, a implantación de criyaders de palomos de competición, ye una menaza ta l’alica. Os suyos amos reconoixioron haber enverenau a dos alicas. “Les molestan y las enverenoron” ha comentau Ernesto. Las deixoron chuntetas en un camín, como querendo redir-se-ne. Preguntau por as posibles pinyoras, ha indicau que “en o chuicio se viyerá”, pero que en istos casos ye complicau encara que o Seprona haiga actuau.

Fuent: http://www.aragon2.com/n-13181-2-Liberada_aguila_perdicera_tras_crear_Plan_Recuperacion_especie

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.