L’independentismo arpitanista d’a Val d’Aosta mide as suyas fuerzas en as urnas

A candidatura de Val d'Aosta Nación quiere dotar a la "nación valdaostana un estau parellano a Luxemburgo u Andorra

Cartel electoral (Foto: Val d'Outa Nation)

Cartel electoral (Foto: Val d’Outa Nation)

Baixo a denominación de Val d’Aosta Nación (Val d’Outa Nation, en arpitano u francoprovenzal), una colla d’independentistas d’a Val d’Aosta se presenta a las eleccions italianas d’os diyas 24 y 25 con a fin de fer sentir una voz que clama a favor d’a independencia d’a “nación valdaostana y d’Arpitania”. Os suyos promotors declaran querer reunir arredol d’o suyo sinyal, antimás de a qui charran francoprovenzal en a Val d’Aosta, tamién a qui tienen ista mesma luenga en a rechión d’o Piemont.

En o programa suyo figura l’afirmación d’a independencia en a demba d’a Europa d’os Pueblos. Os suyos promotors piensan, “como modelos actuals”, en Catalunya, o País Vasco, Chequia, Eslovaquia, Flandres y Quebec. A independencia deseyada por o nuevo partiu habría de levar a la Val d’Aosta a constituir un estau parellano “a Luxemburgo, Liechtenstein, Andorra y Malta”, “con una zona franca y una fiscalidat con avantallas”. Sería un estau que serviría de “coixinet” entre Francia, Suiza y Italia, y facilitaría “inversions productivas y estables, a formación d’una siede important t’a diversas sociedatz, más que más, multinacionals”. Os independentista esfensan que o PIB per capita de l’Aosta independient sería muito más altera que, entre atros, Italia.

Atros eixes d’a propuesta independentista son o rispeto a lo meyo ambient, o refirme a la chicota y meyana interpresa, a protección publica d’a familia que se fa vistera en l’esvielle d’o sistema escolar y en a promoción d’o treballo t’os chovens, a modernización d’os transportes publicos, que van dende o tren dica l’aeropuerto, y a creyación d’un euro alternativo u mesmo una “moneda local alternativa”.

Vocación arpitanista

En o programa suyo figura tamién a voluntat d’amanar-se t’os territorios d’arredol d’a Val d’Aosta que, historicament, han charrau arpitano. Una historia comuna que, dicen os empentadors de Val d’Aosta Nación, “nos amana ta Savoya, Moriana, a Suiza rumanch y o Piemont”. Un conchunto que l’activista valdaostano Joseph Henriel clamó “Arpitania” dende a decada de 1970 pero que nunca no ha desembolicau una identidat nacional comuna.

Dotze candidaturas ta nomás un escanyo

Val d’Aosta Nación, con muitas pocas posibilidatz de conseguir un resultau significativo, ye un d’os dotze partius que presentan candidatura ta conseguir o unico escanyo que la Val d’Aosta esleix en a Cambra d’os Diputaus italiana. Fa bells diyas explicoron que o partiu que tradicionalment ye estau hechemonico en Aosta, l’autonomista Unión Valdaostana, heba patiu una escisión d’o suyo sector más de cuchas, que ha fundau o nuevo partiu Unión Valdaostana Progresista, que tamién presenta candidatura t’a eleccions. Antiparti, en os comicios tamién se presenta atra formación de centro-cucha, Autonomía Libertat Participación Ecolochía (ALPE) que i concurre de conchunta con o Partiu Democratico (PD), favorito ta ganar as eleccions italianas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.