L’independentismo siciliano recupera o sinyal quatribarrau

La disenyo o Movimiento Independentista Siciliano, fundau en 1943.

Logo d'o M.I.S. (Fuent: Wikipedia)

Logo d’o M.I.S. (Fuent: Wikipedia)

Os independentistas sicilianos, encara extraparlamentarios, tornan a quitar t’a carrera os sinyals basaus en as quatre barras. Ye un sinyal que disenyó o Movimiento Independentista Siciliano (MIS) en una primera puenda d’actividat, entre 1943 y 1947, y que recuperó quan renaixió en 2004.

O Reino de Sicilia estió parti d’os territorios d’a Corona d’Aragón, entre 1282 y 1714. Por ista razón, o MIS, que naixió como reacción a la ocupación aliada d’a isla en 1943, prenió as quatre barras a l’hora de disenyar o sinyal independentista.

O sinyal actual de Sicilia ye formau por dos triangulos, amariello y royo, que representan as ciudatz de Palermo y Corleone. En meyo bi ha tres garras flexionadas, que simbolizan a forma d’a isla, y en o centro a cara d’a Medusa mitolochica con alas y tres espigas de trigo, sinyal de prosperidat y fertilidat. As tres garras y a Medusa figuran en o sinyal independentista, sobre un requadro azul en l’angulo superior curcho d’as quatre barras.

Cambio de gubierno

A isla de Sicilia celebró eleccions iste pasau lunes, una anyada antis que no rematase a lechislatura, dimpués de que o president Raffaele Lombardo dimitise en conoixer-se a grau situación economica d’a isla. En un chiro historico, o candidato d’o Partiu Democrata, Rosario Crocetta, ha ganau as eleccions con una coalición refirmada por o debandito partiu, a Unión de Centro y Alianza ta Italia (de centro os dos) y o Partiu Socialista Italiano, que han replegau o 30,5% d’os votos. Debant d’ells yera o expresident d’a rechión siciliana Catania Nello Musumeci, d’o partiu de dreitas La Destra y refirmau por Pueblo d’a Libertat, partiu de Silvio Berlusconi, qui han conseguiu  un 24,7 % d’os votos.

En tercer puesto queda o Movimiento Cinco Estrelas d’o comico Beppe Grillo, que se presentaba solenco y que consigue o 18,8%. Rematando a lista, una coalición de partius locals como Grande Sud y Movimiento por la Autonomía han conseguiu un 15% d’os votos en unas eleccions con una abstención d’o 47,42%.

“Hue a historia de Sicilia ha cambiau. Ha ganau un partiu que se concara con a mafia y voi a gubernar d’unas trazas de raso nuevas respecto a lo pasau”, ha declarau o ganador y probablement futuro president de Sicilia, Rosario Crocetta.

 

Fuent: http://www.vilaweb.cat/noticia/4051281/20121030/lindependentisme-sicilia-recupera-bandera-quatre-barres.html

Una rispuesta a L’independentismo siciliano recupera o sinyal quatribarrau

  1. Son un gran exemplo! Debemos aprender a emplegar siñals tradizionals y no tanta estrela marxista masonica! A tradizión ye o pasato ta remerar y cualsiquier quatrefuella o religada serba millor.

Responder a Chabier Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.