L’Infome RAXEN-2012 replega mas de 4.000 delitos d’odio en l’Estau espanyol

Se publica a edición de l'anyo 2012 d'iste informe publicau por o Movimiento contra a Intolerancia

stop-racismo2-189x300

Foto: Movimiento contra a Intolerancia

L’Informe RAXEN-2012, recientment publicau por o Movimiento contra a Intolerancia, replega numerosos feitos significativos, entre iste anyo, en l’ambito d’o racismo, xenofobia, antisemitismo, islamofobia, neofaixismo, homofobia y atras manifestacions relacionadas d’intolerancia.

Movimiento contra a Intolerancia alerta d’una fuerte ofensiva xenofoba en Europa que incide en o Estau espanyol “dadas as duras circumstancias economicas”. Amás, Movimiento contra a Intolerancia advierte d’o creiximiento d’o discurso d’odio en Internet y d’a urchencia de modificar o Codigo Penal en o sentiu que sinyala a Decisión Marco Europea contra o Racismo y a Xenofobia.

L’Informe sinyala que creixen socialment as actitutz de xenofobia y atras manifestacions d’intolerancia, especialment frent a immigrants, chitanos, personas sin fogar, homosexuals y atros ciudadanos por motivos de diversidat relichiosa y social. En o Estau “se producen discriminacions y delitos d’odio de forma reiterada, que a l’anyo superan as 4.000, contra personas u colectivos estigmatizaus” apostilla l’informe.

Seguntes datos de Movimiento contra a Intolerancia existen grupos racistas en totz os territorios d’o Estau espanyol, mas de 1.500 webs xenofobas, decenas de conciertos de mosica neofaixista y mas de 10.000 ultras. “Se desembolican grupos organizaus que convocan manifestacions y realizan sistematicament propaganda contra a immigración y a diversidat, metendo en periglo a cohesión y a convivencia en a sociedat democratica” alertan.

L’Informe apunta o grieu paper d’Internet, “puesto que s’ha convertiu en un espacio privilechiau pa propagar l’odio, a discriminación y a violencia por motivos de racismo y intolerancia”, asinas como a internacionalización d’o populismo xenofobo, sinyalando que continan as agresions y feitos violentos contra immigrants y atros ciudadanos significaus por a suya diversidat, asinas como a os suyos biens u espacios relichiosos.

Tipificación en o Codigo Penal d’o “delito d’odio”

Tal como sinyalaba o diario Publico, a Organización pa la Seguridat y Cooperación en Europa (OSCE), o Consello d’Europa y l’Achencia de Dreitos Fundamentals d’a Unión Europea han estau “contundents” con os Gubiernos clamando-les a una “acción decisiva frent a o racismo y a xenofobia”, por o que, os autors de l’informe consideran necesaria una Lei de Protección d’as Victimas d’a discriminación y os delitos d’odio. Manimenos, dica que ista Lei sía un feito, l’informe destaca a necesidat d’adoptar midas pa reducir ista mena de delitos.

En iste sentiu, piden que se reconoixca a especificidat d’o “delito d’odio” y que se meta en funcionamiento o refirme “integral” a las victimas de delitos d’intolerancia y crimens d’odio (protección a testigos y adequación d’atestaus y procedimientos chudicials que den guarancia d’actuación eficaz a victimas y ciudadanos debant d’ixos delitos). Atras d’as midas serían o zarre de webs y l’aplicación d’a lechislación penal prevista pa qui por Internet, enzuricen a l’odio, a la discriminación u a la violencia xenofoba, racial, neonazi u a qualsiquier atra manifestación d’intolerancia criminal.

Pa rematar, os autors de l’informe adhiben que o Consello d’Europa fa suya a campanya que emepecipió o Movimiento contra a Intolerancia pa que o Parlamento Europeu proclame o día 22 de chulio, cabo d’anyo d’a matanza d’Utoya, como Día Europeu d’as Victimas de Crimens d’odio.

Fuent: http://arainfo.org/2013/07/el-infome-raxen-2012-recoge-mas-de-4-000-delitos-de-odio-en-el-estado-espanol/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.