L’ingreso de Palestina en o Tribunal Penal Internacional ubre un nuevo frent en o conflicto con Israel

L'Autoridat Nacional Palestina i quiere denunciar a politica d'asentamientos israelí y os posibles crimens de guerra por l'ataque contra Gaza de verano pasau

Siede d'o TPI. Foto: Vincent van Zeijst (CC-BY-SA 3.0)

Siede d’o TPI. Foto: Vincent van Zeijst (CC-BY-SA 3.0)

Tot y que s’anunció en chinero, no ye dica hue que Palestina escayeixe formalment miembro d’o Tribunal Penal Internacional (TPI). A entrada a la institución con siede en La Haya (Países Baixos) ubre un nuevo frent en a disputa diplomatica y legal entre Palestina y Israel, de resultau imprevisto. Como estau miembro, l’Autoridat Nacional Palestina puede denunciar a o TPI a o gubierno israelí. Ye previsto, de feito, que as primeras denuncias sían por a politica d’asentamientos y por posibles crimens de guerra en l’ataque contra Gaza d’o verano pasau. L’ingreso, de vez, fería posible de procesar-ie a os grupos armaus palestinos.

S’aspera que iste nuevo paso enrarezca as relacions entre Palestina y Israel y degrade encara mas o largo conflicto que mantienen. Y ubre uns quántos interrogants por o que fa a o futuro mas imminent. Como por eixemplo qué puede pasar si os dirichents israelís, con o primer ministro israelí Benjamin Netanyahu a o frent, se niegan a compareixer en La Haya a resultas d’una hipotetica petición d’o TPI. Cal recordar que Israel, amás, no’n ye miembro, d’o TPI.

En o cabo de 2014, Palestina decidió de pedir l’ingreso en o TPI, que tiene por misión d’acazar a os autors de chenocidios, crimens contra a humanidat y crimens de guerra de tot o mundo, dimpués de trobar-se que o consello de seguridat d’a ONU le refusaba un prochecto de resolución ta meter fin a la ocupación de territorios palestinos en tres anyos. A solicitut d’o president Mahmud Abbas estió atendida rapidament por o secretario cheneral d’as Nacions Unidas (ONU), Ban Ki-moon, que anunció en chinero que Palestina pasaría d’estar ‘estau observador’ d’o TPI a estar-ne ‘estau miembro’ dende hue mesmo, 1 d’abril.

Fuent: http://www.vilaweb.cat/noticia/4238391/20150401/lingres-palestina-tribunal-penal-internacional-obre-front-conflicte-israel.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.