L’islamista Mohamed Morsi, nuevo president d’Echipto

A comisión electoral ha anunciau o vencedor dimpués d'una semana d'aspera. L'exercito, en estau d'alerta

Mohamed Morsi

Dimpués d’una semana d’aspera tensa, a Comisión Electoral echipcia ha anunciau que o candidato d’os Chirmans Musulmans, Mohamed Morsi, ha ganau as presidencials. Mils d’activistas y partidarios d’a formación islamista que ocupaban dende feba quatro días a plaza de Tahrir, símbolo d’a revolución que fació cayer d’o poder fa un anyo y meyo a o dictador Hosni Mubàrak, han estallau de goyo (vidio) con a proclamación de Morsi, que ha redotau a l’excheneral Ahmed Shafiq.

Seguntes o recuento d’a comisión electoral, Morsi recibió 13,2 millons de votos en a segunda tanda d’o pasau domingo (mas d’o 51%), mientres que l’exministro de Mubàrak, Shafiq, reunió 12,3 millons. A participación estió d’o 51%. A comisión ha invalidau uitcientos mil votos.

O primer comentario d’os Chirmans Musulmans dimpués de l’anuncio d’o resultau ha estau por Twitter: ‘Ye o comienzo d’una nueva era ta Echipto y t’o mundo arabe.’ Tamién han confirmau que ya han empecipiau as conversacions ta formar l’equipo presidencial y ‘un nuevo executivo que realment represente Echipto dimpués d’a revolución’.

Primer president civil y islamista d’Echipto

Mohamed Morsi, de sixanta anyos, se doctoró en incheniería en os Estaus Unius, ha estau diputau independient dende 2005 en Echipto y ha ocupau uns quantos cargos de responsabilidat en os Chirmans Musulmans. O 2011 estió trigau president d’o Partiu Libertat y Chusticia, rama politica d’o movimiento islamista, y en as presidencials substituyó a Khairat al-Xàter, primer candidato y cabeza d’o partiu, quan estió desqualificau. O eslogan en o prencipio d’a campanya yera ‘l’islam ye a solución’ y afirmaba que, si ganaba, deixaría a militancia politica.

Aspera tensa

A tardanza en a proclamación d’os resultaus, prevista primero t’o pasau chueves, empentó a mils de simpatizants d’os Chirmans Musulmans y tamién de partidarios d’a revolución que derrocó a Mubàrak a ocupar a plaza de Tahrir d’o Cairo ta exichir l’anuncio d’o resultau y a derogación d’a esmienda constitucional promulgada o pasau domingo por l’exercito, que modifica a declaración constitucional d’o 30 de marzo d’o 2011. A esmienda de l’exercito, depositario d’os poders presidencials dende a dimisión de Mubàrak, atorga a la policía militar y a os servicios secretos competencia ta detener civils. Os concentraus tamién exichen l’anulación d’a disolución d’o parlamento, decretada por o Tribunal Supremo fa una semana, y a convocatoria d’un referendum ta que a población pueda expresar-se sobre ista qüestión.

L’exercito, en alerta

As Fuerzas Armadas echipcias se troban en estau d’alerta dende hue de maitíns, a resultas d’a publicación d’o resultau d’a segunda tanda d’as eleccions presidencials. A presencia de l’exercito ya se notaba dende primera hora en as carreras, con vehíclos acorazaus debant d’as prencipals siedes d’as institucions publicas. Tamién han zarrau a muga con Gaza.

O chefe d’o Consello Supremo d’as Fuerzas Armadas, Mohamed Tantawi, ha aplaudiu o resultau d’as presidencials y ha felicitau a Morsi.

Fuent: http://www.vilaweb.cat/noticia/4023419/20120625/lislamista-mohamed-morsi-president-degipte.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.