Lituenigo cilebra a fiesta en honor a Sant Blas

En a cilebración se canta una variedat unica d'albada aragonesa

1 febrero, 2013 | Cultura, Tarazona y lo Moncayo | Autor: Felix Jiménez |
O lugar baila arredol d'una chera chigant (Foto: Clara García)

O lugar baila arredol d’una chera chigant (Foto: Clara García)

Mientres iste cabo de semana Lituenigo vivirá una d’as suyas dos prencipals festividatz, a fiesta d’os mozos de Sant Blas. Ista ye una calendata plena de tradicions y d’actividatz de tot tipo.

Os mozos (chovens solteros d’o lugar) se reunen ta cenar y chentar dende a tardada d’o viernes dica o domingo de nueitz. Istas lifaras tienen puesto en a «Casa de Cultura» y son paradas por os novicios (zaguers mozos que son dentraus en a fiesta).
D’as esferents actividatz que se levarán a cabo entre istos diyas destacan a foguera y a ronda d’o viernes y o tradicional maitín d’o sabado.
O viernes de nueitz os mozos enchegan una gran foguera arredol d’a qual s’arroclan totz os vecins d’o lugar ta concarar o fredo d’istos diyas d’hibierno. Una vegada la chent s’ha sacau a fredor d’o cuerpo prencipia a ronda, an que se canta una variedat unica de «jota» aragonesa acompanyada d’a mosica d’a charanga.
O sabado empecipia bien luego con l’aurora que deixa paso dimpués a la llega, en ista os mozos de conchunta con a charanga recorren as carreras d’o chicot lugar recullindo as donacions que a resta d’os habitants les fan, dende diners dica virolla como uegos, chorizos y longanizas u mesmo bell pernil. Iste anyo a colla d’os mozos ye feita por vinticinco personas (incluius os quatro novicios y o mozo mayor).

Una rispuesta a Lituenigo cilebra a fiesta en honor a Sant Blas

  1. Pingback: Agüero celebra a fiesta d’as mascaretas y Lituenigo a fiesta en honor a Sant Blas | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.