L’Observatorio Astrofísico de Chabalambre mira de combinar de traza sistematica espardidura y practica

O director d'o Centro astrofisico charró en as Cortes sobre os prochectos ta l'anyada venient

O director d'o CEFCA en a suya intervención (Foto: Cortz d'Aragón)

O director d’o CEFCA en a suya intervención (Foto: Cortz d’Aragón)

L’Observatorio Astrofisico de Chabalambre mirará d’esdevenir o unico centro d’ista mena en o mundo que “no nomas faiga espardidura de l’astronomía, sino a on que os visitants puedan practicar”. “Combinará de traza sistematica las dos vesants“. Ye una d’as ideyas principals que o director d’o Centro d’Estudios de Fisica d’o Cosmos d’Aragón (CEFCA), Mariano Molés, esfendió iste martes en as Cortes mientres una comparecencia demandada por o PSOE.

A Fundación CEFCA ye a institución d’o Gubierno d’Aragón encargada de implementar en iste centro a investigación que, seguntes Moles “tien dos eixes fundamentals de treballo, o propio Observatorio y una unidat de procesau de datos de muita gran capacidat sin precendents en a nuestra comunidat”. “Más de cient scientificos de tot lo mundo son participando-ie y parando ya la explotación scientifica d’os datos que vendrán”, ha manifestau.

Ta Moles, ye important que a investigación posterior siga lo más multidisciplinar posible, “ta que intrese a contra más scientificos millor”. “Ixo sí, siempre con l’obchectivo central de saber de qué ye feito l’universo, conoixer la materia fosca“, ha expresau o scientifico. Cuanto a lo presupuesto, Moles ha asegurau que “se ha acomodau a lo desembolique d’o prochecto y no bi ha garra dificultat ni en inversions ni t’achustar personal”.

Cuanto a las actividatz que tien previstas o centro, Moles ha anunciau que en 2014 se han responsabilizau d’a trobada bianyal d’astrofisica que organiza l’agrupación estatal. “Tenemos capacidat d’organización y de reunions y hemos de meter-nos en o contexto y panorama d’a investigación europea y internacional”, ha comentau. Antimás, ha apostau por “una total sinerchia con o planetario de Uesca con o fundo común d’a espardidura d’a sciencia”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.