Londra baixo as bombas nazis

Un mapa censa os ataques de l'aviación alemanya sobre a capital anglesa en 1940 y 1941

Entre octubre de 1940 y chunio de 1941, l’aviación alemanya bombardeyó sin piedat a capital anglesa, Londra. Ueito meses de plevia de bombas deixoron vint mil muertos y 1,4 millons de londrenses a la intemperie. Con datos d’os Archivos Nacionals britanicos, a Universidat de Portsmouth ha puesto fer un censo completo, muit revelador, de todas as bombas caitas en as carreras de Londra mientres a Segunda Guerra Mundial.

Bomb Sight amuestra, clarament, un Londra allerau por os raids de l’aviación nazi, explica Kate Jones, un d’os autors d’o mapa interactivo: “Quan s’alufra iste mapa y l’abundancia de bombardeus en a capital, a parola ‘Blitz’ (‘esclatada’, en alemán) adopta tot o sentiu. Ye increyible que Londra haiga sobreviviu a aquell ataque.”

Con Bomb Sight l’internauta puede descubrir como yera Londra en a epoca y explorar mapas precisos, imachens y tamién memorias, vía web y tamién con una aplicación d’Android.

Barcelona, bombardeyada

A iniciativa d’a Universidat de Portsmouth no ye a unica en ista materia. O gubierno catalán, a traviés d’a Dirección Cheneral d’a Memoria Democratica, publicó en 2008 a Barcelona bombardeyada, ta commemorar os setanta anyos d’os ataques aerios italianos sobre a ciudat. Entre cinco mil y siet mil catalans morioron baixo as bombas que, de 1937 a 1939, perpetró l’Aviazione Legionaria italiana, mas que mas en a capital catalana.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.