L’Opel Mokka se ferá en Figueruelas con una inversión inicial de 62,3 millons d’euros

Hue s'ha presentau l'Opel Mokka en a planta d'a multinacional en Figueruelas con a presencia entre atros de Mariano Rajoy u Luisa F. Rudi

opel mokka

Foto: Gubierno d’Aragón

Dende a segunda mitat de 2014, a planta de General Motors en a localidat aragonesa de Figueruelas producirá l’Opel Mokka debiu a la creixent demanda d’iste vehíclo en Europa. Pa ixo, se bi invertirá uns 62,3 millons d’euros en una fase inicial, a la que seguirá futuras inversions. Chunto a o Mokka, se i construyen o Meriva y o Corsa. Iste modelo dica agora nomás se construiba en Corea d’o Sud.

S’ha realizau en a planta aragonesa un acto de presentación que ha contau con a presencia d’o President d’o Gubierno espanyol, Mariano Rajoy, asinas como a d’a Presidenta d’o Gubierno aragonés, Luisa F. Rudi; o Ministro d’Industria espanyol, José Manuel Soria u o President Consellero Delegau de General Motors Europa, Karl Thomas Neuman entre atras autoridatz.

Neuman considera que ista decisión “ye aduyando a salvar 5.800 puestos de treballo” y que “aduyará a paliar a qüestión d’a infrautilización d’a capacidat productiva disponible en Europa”.

Mariano Rajoy ha amostrau a suya satisfacción “por o reconoiximiento a la competitividat y a o liderazgo d’o sector automobilistico espanyol y por a constatación d’a excelencia d’a planta d’Opel en Figueruelas“.

Luisa F. Rudi ha sinyalau a importancia d’ista noticia pa la companyía y pa la economía aragonesa, declarando que “l’esfuerzo ha feito que a planta de Figueruelas se convierta en una d’as mas competitivas d’Opel Europa y por ixo hue s’anuncian as inversions que a fabricación d’o nuevo modelo levará implicitas”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.