Maduro gana por muito poco as presidencials en una Venezuela trestallada

Capriles, candidato opositor a o chavismo, no reconoixera os resultaus "dica que no se cuente cada voto"

Nicolás Maduro en un acto en 2012 (Foto: chavezcandanga)

Nicolás Maduro en un acto en 2012 (Foto: chavezcandanga)

O candidato d’o Partiu Socialista Uniu de Venezuela, Nicolás Maduro, s’ha proclamau ganador d’as eleccions presidencials que se celebroron iste domingo en Venezuela. O candidato d’o chavismo ha conseguiu, manimenos, una victoria muito achustada, con un 50,6% d’os votos. L’aspirant opositor d’a Mesa d’Unidat Democratica, Henrique Capriles, en ha conseguiu o 49,1%. A participación en istas eleccions, convocadas dimpués d’a muerte d’Hugo Chavez, ye estada d’o 78,7%.

“Hemos conseguiu un trunfo electoral chusto, legal, constitucional, popular”, ha declarau Maduro, qui ha calificau o resultau como “una victoria d’o pueblo y un homenache a Chávez”. “Chávez contina invicto y ganando barallas”, ha dito Maduro.

Pero debant d’os resultaus tan achustaus, Capriles ha dito que no los acceptaría dica que se contase cada voto. Y ha demandau que bi haiga una auditoria.

“Hue vusté ye o redotau y o suyo gubierno”, ha dito Capriles. “Aquí a foto d’o país ye una atra, y yo respeto fundament o pueblo que votó por una atra opción, pero exicho respeto a lo pueblo que me ha votau a yo”. Y ha demandau a lo comité electoral que “ubra todas las caixas y que se cuente cadagún d’os votos d’os venezolanos, uno por uno”.

 

A polarización entre simpatizants y detractors de Chavez y os suyo trunfos y fracasos han marcau istos diyas de campanya electoral, a más curta d’a historia d’a democracia venezolana.

Maduro quereba a lechitimidat d’os votos d’os venezolanos ta esdevenir a nueva figura d’o chavismo y encapezar o movimiento bolivariano dimpués d’a muerte de Chávez. D’atra man, Capriles s’heba erichiu en a voz autorizada d’a oposición ta criticar o chavismo y as suyas politicas.

Entre os retos d’o venient president de Venezuela, bi ye a seguridat, principal preocupación d’os ciudadans d’o país, que tien una d’as tasas d’homicidios más alteras de l’America Latina. Pero tamién cal concarar a chestión d’un país que ye de dar que s’ha quedau trestallau en istas zaguers eleccions.

Fuent: http://www.vilaweb.cat/noticia/4105174/20130415/maduro-guanya-poc-presidencials-venecuela-dividida.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.