Maduro se consolida en Venezuela dimpués d’imposar-se en o 58,5% d’as alcaldías

O Partiu Socialista Uniu de Venezuela logra o 44% d'os votos en as esleccions municipals por un 41% d'a oposición encabezada por Capriles

Nicolás Maduro en un acto en 2012 (Foto: chavezcandanga)

Nicolás Maduro en un acto en 2012 (Foto: chavezcandanga)

O Consello Nacional Electoral (CNE) de Venezuela ha anunciau iste domingo que o Partiu Socialista Uniu de Venezuela (PSUV) s’ha consolidau como a prencipal fuerza d’o país dimpués d’imposar-se en o 58,5% d’as alcaldías en disputa en as esleccions municipals celebradas mientres a chornada.

A presidenta de l’organismo, Tibisay Lucena, ha indicau que os datos anunciaus corresponden a o 97,52% d’o escrutinio, de vez que ha cifrau en o 58,92% a participación en as esleccions, seguntes ha informau a cadena de televisión panamericana TeleSur.

“D’o total de votos contabilizaus dica agora, o PSUV obtenió o 44,16%, a MUD (Mesa d’a Unidat Democratica, alianza opositora) o 40,96%, o Partiu Comunista de Venezuela (PCV) l’1,6 por cient, y atros o 13,26%“, ha afirmau.

En cifras, o partiu gubernamental ha aconseguiu un total de 5.111.336 votos, por debant d’os 4.435.097 votos, obtenius por a MUD. A resta de partius s’ha feito con 833.731 respaldos, tal como ha replegau l’achencia estatal venezolana de noticias, AVN.

“Le queremos dar a felicitación a o pueblo tot de Venezuela que una vegada mas salió a votar, a expresar a suya opinión, o suyo deseu, a suya sobiranía a traviés d’o voto”, ha apostillau Lucena.

O zarre d’as mesas empecipió a las 18.00 (as 22.30, hora en l’Estau espanyol) en totz os colechios fueras d’aquells en que i hese chent asperando ta votar.

Horas antes d’o zarre, tanto o president venezolano, Nicolás Maduro, como o prencipal lider opositor, Henrique Capriles, facioron un clamamiento a votar y a respectar os resultaus d’as esleccions.

Arredol d’as 14.00 (hora local) Maduro acudió t’o Liceo Bolivariano Miguel Antonio Caro, en Libertador, Caracas, ta exercer o suyo dreito a o voto, vestiu con a ya popular chaqueta de chandal con as colors d’a bandera venezolana.

Hue ye un día de democracia, de participación protagonica d’un pueblo que tiene en as suyas mans o destín d’ista patria“, dició. Maduro instó “a totz os venezolanos de corazón a votar”, explicando que “con o voto se ye guarenciando a paz porque d’ista forma se ye confiando en o CNE”.

Amás, defendió o programa electoral d’os candidatos d’o gubernante PSUV. “No somos uns improvisaus, tenemos un prochecto de país“, aseveró, recordando que o suyo antecesor en o cargo, Hugo Chávez, les deixó “en guardia y custodia d’una obra patria”.

Una hora dimpués, Capriles plegó en o colechio Santo Tomás de Villanueva, tamién en Caracas, ta sufragar. “Iste ye o momento d’os valients, d’unir-nos ta redotar l’abstención. No permitamos que atros decidan por nusatros“, dició.

O lider opositor denunció “a desigualdat” y “os abusos” cometius por o Gubierno entre a campanya electoral y urchió a concarar-los en as urnias. “A fuerza que tien cadagún de vustés no puede deixar-se doblegar por qui tractan de chantachear-los”, remachó.

Iste domingo uns 19 millons de venezolanos yeran clamaus a las urnias ta eslechir a 335 alcaldes municipals, un alcalde metropolitano, un alcalde de distrito y uns 2.500 concellers en tot o país.

Fuent: http://www.eldiario.es/internacional/Maduro-consolida-Venezuela-imponerse-alcaldias_0_205429490.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.