Mailing

Gonzalo González

Os partius aragoneses con representación en L’Aljafería se gastoron 800.000 € solament en o mailing d’as pasadas eleccions aragonesas seguntes a Camera de Cuentas. O ninvio d’as papeletas fisicas, o sobre y publicidat electoral ye un d’os prencipals capitols d’o gasto d’as campanyas. Un capitol important, pero que podría ser perfectament sacau. A suya supresión no solament suposaría un estalbio de diners publicos, amás sería una medida democratizadora ta la qual os partius no son disposaus.

En muitos países a lechislación electoral estableixe que solament ye posible votar con as papeletas que se facilitan en o colechio electoral. Existen tantas papeletas como votants censaus. Al acreditar a suya identidat a o votant se le facilita a papeleta y en a cabina electoral, totalment solenco, marca a opción trigada. Iste mecanismo ye o que a propia OSCE y a UE recomienda en as suyas misions d’obserbación electoral.

No se tracta d’una qüestión menor. En l’estau espanyol, con o sistema actual, ye una gran mayoría o numero de votants que sale de casa con a papeleta ya trigada. Por o que os partius que no tienen a posibilidat economica de bosar un mailing, quedan difuera d’a decisión de voto d’a mayoría d’os ciudadans. Ye una estorsión clara d’a libertat de l’elector. Amás repercute en que bi ha mas interferencias en a decisión de voto y muitas personas no pueden fer una decisión con absoluta libertat.

Ye o caso d’o clamau voto familiar, o pai de familia decide o que va a votar o güelo u a suya muller, u os casos de monchas que quitan a os güelos con a papeleta en a man. No se tracta d’una qüestión menor, as presions d’o redol más d’aman son muito mayors de o que pareixe.

A prohibición d’o mailing electoral sería una gran mida democratizadera, pero cal planteyar a calidat d’as nuestras libertatz quan os propios partius prefieren una democracia low cost.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.