Malí insiste en desarmar a guerrilla tuareg antis d’as eleccions

Negociacions en marcha ta prebar de convencer a Bamako de sinyar l'alcuerdo que o MNLA ha acceptau

azawadazawadA guerrilla de mayoría tuareg d’o Movimiento Nacional t’a Liberación de l’Azawad (MNLA) ha acceptau l’alcuerdo provisional que les han ufriu os mediadors de Burkina Faso ta permitir o desplegue de l’exercito maliense en a provincia de Kidal antes d’as eleccions presidencials de Malí, previstas t’o venient 28 de chulio.

L’alcuerdo, manimenos, encara no tien o visto bueno de Malí. O diario maliense L’Essor explica que Bamako, con o president Dioncounda Traoré a o frent, no veye claros bells aspectos d’a proposa presentada por o president burkinés, Blaise Compaoré. En particlar, i hai dos aspectos d’o pacto que no fan goyo en Bamako: que o desplegue de l’exercito maliense en a provincia de Kidal (agora en mans d’o MNLA) s’ha de fer conchuntament con una fuerza de paz internacional y con o control d’una comisión mixta de totz dos bandos en conflicto, y que o MNLA conservaría o suyo armamento una vegada se retirase d’as posicions actuals. Bamako querría que a guerrilla quedase desarmada chusto antes d’as eleccions.

As negociacions continaban iste viernes ta arrocegar a Malí enta l’alcuerdo. O pacto ye a condición previa ta que as eleccions presidencials se puedan desembolicar en tot o territorio maliense.

Pero seguntes explica Reuters, o gubierno maliense recibe presions en a mesma Bamako -por eixemplo por parte d’a chudicatura- ta no acceptar os termins de l’alcuerdo que ha proposau Burkina Faso. O dichital MaliActu interpreta tamién que t’o gubierno de Malí ye dificilment acceptable un documento an que se charre de “l’Azawad”, o toponimo que usa o MNLA ta referir-se a o norte de Malí. Legalment, en Malí no existe garra subdivisión administrativa de l’Azawad, soque quatro provincias: Kidal, Gao, Timbuctú y Mopti.

A guerrilla tuareg veye una puerta t’a resolución d’o conflicto

Entremistanto, o MNLA s’ha afanau en anunciar en a suya web que acceptaba l’alcuerdo proposau por os burkinesos. A guerrilla, que ha renunciau formalment a l’obchectivo d’a independencia de l’Azawad, diz que o pacto lo sinya “en a perspectiva” de poder encarar “negociacions politicas que desemboquen en un estatuto churidico ta l’Azawad“. A guerrilla entiende que o conflicto con Malí se remonta a 1960 -anyo d’a independencia d’a excolonia francesa- y reclama a constitución d’una autonomía ta l’Azawad.

A guerrilla tuareg, manimenos, sabe que le quedaban pocas opcions que no estasen a sinyatura d’o pacto. Y ye que l’exercito maliense, rearmau y reorganizau, a semana pasada fació una demostración de fuerza en recuperar a localidat d’Anéfis, chusto en a muga entre as provincias de Kidal y Gao. As fuerzas armadas malienses menazoron alavez de tomar a vía directa y recuperar por a fuerza tot o territorio de Kidal. Precisament, o que quiere evitar o MNLA, que teme una oleada de represalias por parte d’os soldaus malienses contra a población tuareg d’o territorio.

Fuent: http://www.nationalia.cat/ca/noticies/1486

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.