Mallorca vive espantada o pior incendio d’o sieglo

O fuego contina vivo en a sierra de Tramuntana. Ya ha ixarrallau amán de dos mil hectarias

incendio andratx

Vista d’a NASA de l’incendio dende l’espacio

A sierra de Tramuntana, espacio protechiu por a UNESCO por as valors ambientals y etnograficas, ha viviu tot o cabo de semana o pior incendio d’iste sieglo en Mallorca. Amán de dos mil hectarias ya han quedau cremadas y quasi uitcientos habitants n’han habiu d’estar desaloixaus por o periglo. Entre as zonas cremadas ye a Trapa, una torre considerada l’emblema de l’ecolochismo mallorquín. O fuego tien tres frents: Andratx, Estellencs y Galatzó , iste zaguer o mas descontrolau agora.

O fuego que crema dende o viernes ha obligau a desaloixar dica agora mas de uitcientas personas de quatro puestos menazaus por as flamas, especialment en Estellencs y a reserva d’o pueyo d’o Galatzó.

A calor y a baixa humedat d’istes días, de conchunta con un aire cambiant, son os prencipals obstaclos pa estabilizar-lo. O dificil acceso en a zona d’o fuego ha embolicau encara mas os quefers d’extinción, que se concentran prencipalment en os medios aerios: hidroavions, avionetas y helicopters. De feito, ye o desplegue mas gran d’istas caracteristicas en as Islas.

Con quasi dos mil hectarias calcinadas dica agora, a mayoría de selva mediterrania, ye l’incendio mas grieu que i hai habiu en as Islas dende fa quasi dos decenios, tanto en extensión como en danyos a l’ecosistema, como que crema a sierra de Tramuntana, un parache protechiu y declarau Patrimonio d’a Humanidat por a UNESCO. Una d’as zonas arrasadas ye a torre d’a Trapa, un simbolo d’o movimiento ecolochista mallorquín que o Grupo Ornitolochico Balear (GOB) adquirió en 1980 con una campanya popular pa salvar-lo d’a urbanización. Precisament, l’1 de chunyo de 1994 as uitanta hectarias d’a Trapa ya se cremoron.

Fuent: http://www.vilaweb.cat/noticia/4136411/20130729/mallorca-viu-espantada-pitjor-incendi-segle.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.