Manifestación antitaurina en Zaragoza

Milenta presonas han dixau platera o suyo refús a las corridas de toros

Antitaurins en Zaragoza (Foto: Primo)

Antitaurins en Zaragoza (Foto: Primo)

Mas de milenta presonas acudioron a la manifestación antitaurina, ya tradicional en as Fiestas d’o Pilar de Zaragoza. Os manifestant quereban protestar contra o maltrato animal. En un ambient de fiesta han dixau platera a suya intinción de aconseguir que Aragón, dimpués de Canarias y Catalunya siga declarau territorio antitaurino.

A cerenya presencia policial ha feito de muga dentre os manifestants y os asistents a la corrida que se feba en a Misericordia, encara que han habiu bellas faltadas dentre uns y atros. Iste ye o nueno anyo que se fa ista manifestación mientres que as Fiestas d’o Pilar y coincidindo con a cilebración d’a Feria taurina de Zaragoza en o Coso d’a Misericordia que chestiona a DPZ.

A organización d’a manifestación, formada por asociacions en esfensa d’os dreitos d’os animals y por organizacions ecolochistas, cifró l’asistencia en bellas 200o personas. Dimpués d’estar-se amán d’a plaza, a concentración se tornó manifestación y baixó por a carrera Conde de Aranda. O gran dispositivo policial, con más de 10 furgons y a embute de achents, alticamó a beluns d’os manifestants que se queixoron por no poder salir-se d’as mugas que establiba a policía. Encara que bi habió bells intes de tensión, a la fin no plegó a más y a manifestación remató de traza pacifica debant d’a siede d’a DPZ.

Astí se leyó o manifiesto, a on que se remeró a vieda d’as corridas en Canarias y Catalunya y se animó a que Aragón estase o venient territorio en prener ixa mida.

Antimás de por as corridas de toros, tamién se i protestó por atras trazas de tortura animal presents en as fiestas como bells circos que fan servir animals u os ponis d’as ferias.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.