Manifestación en defensa d’un servicio publico ferroviario de calidat en Aragón

Con o lema "No perdamos o tren", una manifestación en Zaragoza reclamará o domingo un servicio ferroviario publico y de calidat ta Aragón

final2Iste venient domingo 23 de chunio en Zaragoza se celebrará una manifestación en defensa d’un ferrocarril publico y de calidat en Aragón con o lema “No perdamos o tren”. A manifestación ye convocada por a Plataforma por o Desembolique d’o Servicio Publico Ferroviario en Aragón debant d’as recients pretensions d’o Ministerio de Fomento espanyol de reducir significativament o servicio de rechionals y trens de media distancia debiu a la poca rentabilidat d’os mesmos y d’a baixa afluencia de viachers.

A Plataforma deixa claro en o manifiesto que “ista situación ha estau conseqüencia directa de l’abandono y a desinversión a las que o ferrocarril convencional ha estau sozmeso mientres decenios“. Tamién adhiben que contar con un servicio ferroviario fuerte y de raso publico “ye pieza fundamental t’a vertebración d’o territorio, o sostenimiento d’o medio rural y a promoción d’o nuestro desembolique economico“.

Asinas mesmo inciden en a importancia d’o ferrocarril en a luita contra o cambeo climatico y en a necesidat de reducir os gases d’efecto hibernadero, amás d’aumentar a eficiencia enerchetica.

A Plataforma demanda “a reobridura d’o Canfranc, modernización d’as linias ferroviarias d’alta valor estratechica como o trazau Zaragoza-Valencia, millora en o ret de cercanías, adequación d’os horarios a las necesidatz reals d’os usuarios, promoción d’a intermodalidat entre trens y autobuses u permitindo que os usuarios d’os servicios puedan puyar a bicicleta a o tren”.

Con tot isto, exichen a o Gubierno d’Aragón que empente con o Gubierno espanyol a elaboración d’o Plan Rechional de Transportes, “basau en a intermodalidat tren-autobús” y “que preveiga y determine as inversions a acometer, guaranciando l’adequada comunicabilidat de todas as nuestras comarcas aintro d’un modelo publico sostenible y adaptau a las nuestras necesidatz”.

Finalment s’amuestran dispuestos “a defender Aragón d’os retalles en os servicios publicos ferroviarios y a promover a suya millora y ixample” clamando a la sociedat aragonesa y a las suyas institucions a refirmar o manifiesto y a unir-se-ie.

Una rispuesta a Manifestación en defensa d’un servicio publico ferroviario de calidat en Aragón

  1. Pingback: Manifestación en defensa d’un servicio publico ferroviario de calidat en Aragón | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.