Mann Filter contra o líder Ros Casases

As zaragozanas se mirarán de sorprender a o millor equipo d'ista temporada en a Liga Femenina, o sabado venient, 4 de febrero, a las 17.30 horas, en o Pavillón 'Fuente de San Luís' de Valencia chugando frent a o 'Ciudad Ros Casases'.

Cristina Ouviña en un partiu con o CDB Zaragoza (Foto: Biquipedia)

Si magnifica y de record ye a racha de diez victorias continas logradas dica a chornada pasada con a victoria de l’equipo de Víctor Lapeña debant d’o Celta de Vigo, tamién ye igualment sensacional que l’equipo valenciano d’o Ros Casases, no haiga perdiu garra partiu en Liga y leve 16 victorias continas.

D’iste equipo, l’entrenador manyo, Lapeña, piensa que, “d’o rival poco que dicir, será bonico competir a o limite contra o qual son valuradas como millors chugadoras d’o mundo”. Y referent a l’estau de cómo se troban as chugadoras manyas, Víctor Lapeña piensa que, “a nusatros o partiu con Ros nos pilla en un inte dificilismo. As baixas de Pina y Ouviña nos deixan mermaus d’efectivos. Con tot y con ixo a gran confitanza que i hai en o grupo supera qualsiquier adversidat”.

Efectivament, María Pina y Cristina Ouviña serán baixas ta iste choque con o Ros, ya que todas dos no s’han recuperau d’as suyas dolencias. De Pina sería precipitada la suya retrobada con as pistas, y lo mesmo de Ouviña que no ye recuperada de raso d’a trobada y commoción que padeixió en o partiu frent a las gallegas de Vigo.

En o partiu que se disputó en Zaragoza ya vencioron as que alavez entrenaba Natalia Hejkova por 60 a 78. Y l’equipo valenciano venció o pasau miércols en a Euroliga por 98 a 80 a o Galatasaray de Turquía, unatro súper equipo.
O nuevo entrenador d’o Ciudat Ros Casases ye Roberto Iñiguez, que substituye a Hejkova y que ha sabiu fer-se-ie a escape a las súper estrelas con as que conta a plantiella valenciana.

D’iste Ros Casases, an todas pueden estar titulars, pareixe que se troban en excelent forma a hispana Sancho Little, amén de l’americana Eshaya Murphy, a francesa Isabelle Yacoubou, a belga Ann Wauters y l’australiana Lauren Jackson. Pero amás conta con as internacionals espanyolas Silvia Domínguez y Laia Palau, más a nueva encorporación WNBA, Maya Moore, a checa Jana Vasela y a hongara Katalin Honti.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.