Mann Filter recibe a o Girona F.C.

Totz dos equipos son empataus a 13 victorias cadagún, por o qual resalta a importancia d'o choque t'a futura clasificación final d'a Liga Femenina.

Queralt Casas ha estau nombrada a segunda millor chugadora choven europea (Foto: Basket Mann Filter)

Quatreno contra cinqueno, ixe será o partiu que enfrentará en o Pavillón Sieglo XXI hué, miércols 15 de Febrero, a o Mann Filter de Víctor Lapeña contra o Girona F.C. d’Ana Caula.

O partiu correspondient a la ventena chornada de Liga será arbitrau por os colechiaus vascos, Sergio Manuel y Gorka García.

En o transcurso d’o partiu se quiere rendir un homenache a Queralt Casas, a o que s’unirá o patrocinador d’o Club, Mann Filter, porque a choven chugadora catalana ha estau nombrada, en segunda posición, como millor chugadora choven europea, a o que segurament s’unirán gran numero de seguidors de l’equipo y d’a chugadora.

Encara que Mann Filter sía quatreno, en realidat totz dos equipos son empataus a 13 victorias cadagún, por o qual resalta a importancia d’o choque t’a futura clasificación final d’a Liga Femenina.

T’o Director Cheneral de Mann Filter, Antonio Manero, o partiu ye “una oportunidat unica ta emparar a l’equipo, una freda tarde en a qual asperamos, con l’asistencia d’o maximo numero de personas, quitar una nueva victoria de cara t’o play off por o títol”.

Y referent a como se troba l’equipo, “Dimpués d’a victoria cullida en a dificil pista d’o Choventut Mariana de Soller, o animo de l’equipo ye por as boiras”.

D’o rival, Manero opina que, “o Girona F.C ye l’equipo que dentra en a Copa d’a Reina, deixando-nos difuera y por isto, o partiu será especial”.

Cal remerar que en o partiu disputau en a localidat catalana en a primera tornada, ya venció o conchunto amariello de Víctor Lapeña por 61 a 73, con l’actuación brillant de Cristina Ouviña como maxima encestadora con 16 puntos, seguida de Jaklin Zlatanova con 11.

L’equipo d’o Girona FC. entrenau por Ana Caula, que fa uns días ha dau de baixa a la suya escolta americana Jane Morris, seguntes pareixe por temas economicos, tiene en o suyo pívot archentina Gisela Vega a o suyo mayor periglo ofensivo, que ha estau en tres ocasions MVP d’a Liga. Con 286 puntos anotaus, fa uns promeyos de 15,05 por partiu.

Ye muit bien aduyada por unatra pívot, americana, Angelica Robinson, que ye a millor reboteadora de toda a Liga con 223 capturas, ye dicir 11,74 de promeyo.

Completan l’equipo que participará en a proxima Copa d’a Reina, las bases Noemí Jordana y l’anglesa Shona Thorburn, y as aleros Anna Carbó y a senegalesa Oumoul Sarr.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.