Manuel López continará estando rector d’a universidat

Ganó con un 59,05% d'os votos ponderaus

Manuel López (Foto: Web d'a campanya)
Manuel López (Foto: Web d’a campanya)

Manuel López continará estando rector d’a Universidat de Zaragoza atras quatre anyadas más. Asinas lo decidió ahiere a comunidat universitaria en as eleccions que se celecroron en totz os suyos centros. Con un total de 3.044 votos ganó a Manuel Gimeno qui en consiguió 2.321. Antimás se contorón 195 votos nulos y 513 en blanco.

Entre o personal docent (PDI), profesors y investigadors d’os diferents sectors universitarios, o ganador estió Manuel López por 1087 votos debant d’os 673 de Gimeno. Con tot y con ixo López no consiguió ganar en as facultatz de Dreito, Merecina, Economía, Salut Publica y Interpresa y Chestión Publica.

Manimenos, en o sector d’o PAS (Personal d’Administración y Servicios), o ganador estió Gimeno por 492 votos contra 466 ta López. A participación d’iste sector estió de poco más d’o 50%.

Entre sector d’estudiants, a participación tornó a estar prou baixa, de nomás un 8,72%, por debaixo mesmo de fa quatre anyadas quan bi habió un 9,98%. Igual como en o sector d’o profesorau, Gimeno ganó en os centros de Dreito, Economía, Escuela de Incheniería y Arquitectura, Interpresa y Chestión Publica, Enfermería de Uesca y o Centro Universitario de Defensa.

As eleccions ta rector se celebran dende o zaguer cambio d’a Lei Universitaria y o voto ye ponderau. Asinas, os doctors permanents (1715 personas) contan un 53%, a resta d’o PDI a tiempo completo (752 personas) un 14%, o PDI a tiempo parcial (1276 personas) un 2%, o PAS (2117 personas) un 10% y os estudiants (33.847 personas) un 21%.

 

 

Una rispuesta a Manuel López continará estando rector d’a universidat

  1. Agora que faiga cosetas por l’aragonés, como dició a os d’O Trango

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.