Marea Blanca prencipia la campanya informativa ‘Listas 0′

Prencipian antimás una campanya de replega de centimos ta "aduyar a ubrir de tardis os quirofanos".

A Marea Blanca o pasau 12 de mayo (Foto: El Ventano)

A Marea Blanca o pasau 12 de mayo (Foto: El Ventano)

Marea Blanca Aragón ha prencipiau iste miercols una campanya con o lema ‘Listas 0’ en respondendo a que s’ixamplen terne que terne as listas d’aspera debiu a las retalladas que somos sufrindo en Sanidat”. Mientres a campanya informarán t’as personas usuarias d’a sanidat publica, sobre os trangos que les cal dar tanto adintro como difuera de l’hespital en caso de que no s’apanyen os problemas suyos.

Marea Blanca denuncia que a meya ta una intervención de pneumolochía u una consulta de traumatolochía, se puet tardar en o millor d’os casos, tres meses, una consulta d’o dichestivo mesmo 5 meses, un scanner preferent mesmo 2 meses y asinas asinas. “A tot isto cal sumar-le que os quirofanos en a sanidat publica quasi no funcionan en horario de tardis y se destinan 3.000 millons d’euros t’a privada ta operar”, adhibe a Marea.

Marea Blanca ha exichiu a lo Gubierno d’Aragón “o pleno funcionamiento d’os quirofanos publicos en horario de tardis y que ixos millons d’euros t’as clinicas privadas se destinen a achustar chent en turno de tardis ta que os quirofanos d’os nuestros hespitals publicos funcionen a tot rendimiento”. En iste sentiu, Marea Blanca pregunta: “¿Porque en habendo-ie recursos publicos, se trasvasan t’a sanidat privada?. A respuesta son intreses partidistas y chupius d’un afán pos esfer a sanidat publica”, se responde a propia Marea.

Hue a las 18.00 en a Plaza d’Espanya de Zaragoza, Marea Blanca meterá o primer punto informativo que repetirán mientres toda ista semana a la mesma hora en diferents puntos d’a ciudat. O miercols serán en a puerta principal d’o Centro Comercial Grancasa (ACTUR), o chueves en a carrera Delicias, debant d’a siede de l’Asociación de Vecins y o viernes en a Plaza d’as Canteras de Torrero. A semana venient meterán o punto informativo en horario de maitins, o lunes 20 en o Centro d’Especialidatz Grande Covián (Avenida Alcalde Caballero, o martes 21 en a puerta de Consultas Externas de l’Hespital Clinico Universitario Lozano Blesa, o miercols 22 en a puerta de Consultas Externas de l’Hespital Miguel Servet y ta rematar o chueves 23 en l’Hespital Royo Villanova (Sant Gregorio) y en l’hespital Provincial (carrera Ramón y Cajal).

Antimás d’informar a los ciudadans, a Marea Blanca ferá una “replega simbolica” de un centimo. O diya 28 de mayo, tot lo replegau le’n darán a lo conseller Ricardo Oliván, en o SALUD, ta “aduyar” a lo Gubierno a que se ubran de tardis os quirofanos.

 

Fuent: http://arainfo.org/2013/05/marea-blanca-inicia-la-campana-informativa-listas-0/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.