Más de 100.000 presonas esfienden os dreitos d’os presos vascos en Bilbao

Dende Aragón tamién plegó buena ripa de chent ta refirmar a manifestación

8 enero, 2012 | Politica | Autor: Arredol | Tweet

Más de 100.000 presonas se manifestoron ahiere por as carreras de Bilbao ta esfender os dreitos d’os presos vascos. Os organizadors, Egin dezagun bidea, heban demandau que estase una movilización masiva, y a la fin, a manifestación esdevenió a más gran manifestación contra la dispersión penitenciaria. Familiars de presos d’ETA y atras organizacions marchoron debant d’as milentas de presonas que trancoron tot o centro de Bilbao.

En o manifiesto final se leyió un manifiesto que demandaba trangos a os gubiernos espanyols y francés ta rematar a politica penitenciaria actual dimpués d’a fin d’a luita armada d’ETA. Ta os organizadors d’a marcha o dialogo y os alcuerdos son alacetals ta rematar a etapa d’a violencia, represión y dolor. En tot caso, ahiere mesmo, dende o gubierno vasco se remeraba que a politica penitenciaria ye adequada a o tiempo, y que no corresponde a o gubierno vasco de cambear-la. Encara que organizacions de victimas heban demandau a prohibición d’a marcha, o chuez Grande Marlaska, de l’Audiencia Nacional, premitió de fer-la siempre que no se amostrasen imachens d’os presos d’ETA.

A marcha d’ahiere teneba o refirme de partius y sindicatos vascos, como Aralar, Bildu, Eusko Alkartasuna, Ezker Abertzalea, LAB u la iniciativa Lokarri. Cien concellos vascos tamién han aprebau una moción ta refirmar-la. Dende Catalunya, tamién dende Aragón, Bretanya, Galicia u Castiella colectivos y presonas han refirmau a manifestación contra a dispersión d’os presos vascos.