Más de 200 personas perderían o treballo por o zarre de Kimberly Clark en Calatayú

A interpresa fabricant de panyals zarrará a suya planta bilbilitana en mayo. O impacto economico en a redolada sería prou grieu

Planta de Kimberly Clark (Foto: CCOO)

Planta de Kimberly Clark (Foto: CCOO)

Si no bi ha bella solución de zaguer hora, a planta de Calatayú de Kimberly Clark, adedicada a la producción de panyals, zarrará as suyas puertas ta mayo, deixando sin treballo a más de doscientos treballadors. A interpresa, un d’os chigants d’o sector papeler y que fabrica a marca Huggies de panyals, ye en un proceso de resestructuración d’as suyas plantas por toda Europa, a on que no en deixará ubierta que una en Italia.

A planta ye productiva y funciona a pleno rendimiento. Por ixo, ni a interpresa s’explica porque no la ha quiesto mercar dengún, ni os treballadors porque se zarra. A decisión de Kimberly Clark deixaría sin treballo a 208 treballadors directos d’a interpresa y a atros 23 de sector lochisticos, seguridat y restauración. Ista ye una d’as más grans interpresas d’a comarca de Calatayú y o suyo zarre sería un furo trucazo t’a economía d’a redolada.

En octobre, a dirección de Kimberly Clark anunciaba la venda d’a planta bilbilitana y se prencipiaba a mirar belatra interpresa que podese mercar-la y continar con a producción. Quasi meya anyada dimpués ixe mercador no ye plegau y “a companyía s’ha visto forzada, como unica alternativa, a proposar o zarre d’as instalacions”, aseguraban representants d’a mesma.

O comité d’interpresa  amostró o suyo refús ta una decisión que consideran “dramatica y que fa muito mal t’os treballadors directos y indirectos d’a fabrica, que han teniu un comportamiento profesional y exemplar mientres todas las anyadas de historia d’a planta.” Tamién estioron conscients d’as conseqüencias economicas t’a redolada y creyen que ye alazetal ta Calatayú “continar con l’actividat en a fabrica”. Aclaran antimás que “encara no se ha feito a notificación de que se ubre o periodo de consultas que estableix a lei t’os casos de despidos colectivos.” En no tener más información de man d’a interpresa, o comité ha decidiu de no fer más declaracions por agora.

L’alcalde de Calatayú, Jose Manuel Aranda (PP), se ha solidarizau con os treballadors y s’ha comprometiu a mirar solucions t’as familias afectadas. De man d’o PSOE, Javier Sada tamién s’ha quiesto solidarizar con a plantilla y ha demandau a lo Gubierno d’Aragón que siga capable de trobar a belun que merque a planta antis d’o mes de mayo.

Jose Luis Soro, de CHA,  tamién ha exichiu a lo Gubierno que “luite por conservar os treballos en una interpresa que siempre se ha considerau rendible”. “No tien sentiu que mientres meses a Dirección y o Gubierno d’Aragón haigan asegurau que bi heba qui mercase a planta de Calatayú y agora se tranque sin más.” Dende iste partiu han anunciau antimás que presentarán una iniciativa en as Cortes d’Aragón y que se reunirán con o comité d’interpresa ta mirar de trobar solucions.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.