Más de 5.000 personas “se mullan” en esfensa d’a sanidat publica

Os manifestants esfienden a sanidat publica "contra la privatización d'a sanidat" y as zaguers midas d'o Gubierno d'Aragón.

foto manifestacion

Imachen d’a manifestación (Foto: Plataforma contra la privatización d’a sanidat)

A tamás d’a fura plevia que bi habió en Zaragoza iste domingo, a manifestación convocada por más de quaranta asociacions vecinals, colectivos socials y organizacions sindical alternativas, en contra d’as politicas de retalladas y privatización d’o Sistema Publico de Salut, arrocló a bellas 5.000 personas en o centro d’a ciudat, que veniban de tot lo país.

Os partitipants exichioron a lo Gubierno d’Aragón que no achiquise a calidat d’a prestación sanitaria en tot lo territorio, lo que, seguntes os organizadors “ya ye pasando, en haber-ie una inversión publica menor y deixar a las interpresas privadas a chestión de bellas partis d’o sistema publico de salut.”

Entre as retalladas, a Plataforma contra la privatización d’a sanidat en Aragón, en nombra bellas quantas como o zarre de urchencias os sabados de tardes en más de vinte municipios d’a provincia de Zaragoza, o desmantelamiento d’o C.M.E. Grande Covián, sacar de l’asistencia sanitaria a la población extranchera en situación administrativa no regular, a privatización d’os laboratorios seguindo o modelo de Madrit u o modelo de chestión privada de l’hespital d’Alcanyiz. Tot ixo dicen que ye “a verdader ufierta de dialogo que fa Luisa Fernanda Rudi, presidenta d’Aragón”.

Os manifestants esfienden “un sistema sanitario basau en a universalidat, a gratuidat y a calidat asistencial.” Tamién bi habió protestas en Uesca, o sabado y en Teruel y Calatayú o mesmo domingo.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.