Más de 50 ninos y ninas d’o vico de Roseras no conseguirán plaza escolar en o vico suyo y no podrán ir “andando t’o cole”

O vico de Roseras d'a Canal tien más de mil ninos y o suyo colechio menos de 700 plazas

CEIP Rosales del Canal (Foto: Arainfo)

CEIP Rosales del Canal (Foto: Arainfo)

En rematar-se o plazo de presentación de solicitutz t’a triga de colechio en o proceso d’admisión d’o curso escolar 2013/2014, “se torna a deixar esclatera a falta de planificación y previsión en l’aria sur d’a ciudat“, denuncia Francisco Javier García Sobreviela, portavoz d’a Plataforma “Andando t’o cole” d’o vico zaragozano de “Roseras d’a Canal”.

Agora mesmo t’os vicos de Val d’Espartera, Montecanal, Arcosur y Roseras d’a Canal no bi ha que quatre colechios, estando de dar que no’n son prou ta acullir a demanda educativa d’agora y d’o futuro. Ta istos centros son plegadas más demandas que plazas teneban, estando lo caso más grau o d’o CEIP Roseras d’a Canal a on que a demanda estió d’un 183% d’a ufierta (137 solicitutz ta 75 plazas).

Iste lurte de solicitutz yera previsible, porque nomás en Rosera bi ha quasi 130 ninos y ninas censaus que optan estianyo a plaza escolar, a los que cal adhibir los d’Arcosur, que o suyo centro de referencia ye lo mesmo. “Ista situación ye ta fer-se-ne, ya que, en o pior scenario, más de 50 ninas y ninos d’o vico de Roseras no conseguirán plaza escolar en o vico suyo, y no podrán ir andando t’o cole”, sinyala Francisco.

A distancia meya t’atro colechio ye de 2,1 km, entre que, por un regular, t’a resta d’a ciudat, ye de 817 m. En iste sentiu Francisco remera que “isto provoca un verdader handicap t’os pais a l’hora de demandar un centro como primer opción ya que, en no haber-ie un atro centro a menos de 1 km, nomás tienen una opción de conseguir os puntos por proximidat, no podendo optar t’atros centros si lo queresen”.

O CEIP Roseras d’a Canal ye estau o colechio más demandau de Zaragoza debiu a que aintro de l’aria suya de influyencia (Roseras d’a Canal, parti de Montecanal, parti d’Arcosur y zona Ueste de Val d’Espartera) atiende a una población infantil por dencima d’a meya. Nomás en Rosera bi ha 1.115 ninas y ninos entre 0 y 9 anyadas y o colechio tien una capacidat de 675 plazas.

A solución dende Educación ye estada enamplar plazas en zona Romareda y concertar un colechio privau en Casablanca, o Virchen de Guadalupe. “Más bien se tracta d’una “Sin solución”. Os colechios de Romareda son a bells 6 km en transporte publico. As rutas escolars d’istos centros no son garra solución factible, porque antimás d’o coste economico, en estar un vico periferico, replegerían a los ninos de Roseras os primers y los deixarían os zaguers, lo que suposaría un tiempo meyo en desplazamientos de dos horas diyarias, bella cosa de tot incomprensible en tractar-se de ninos de tres anyadas”, denuncia Francisco.

A Plataforma “Andando t’o cole” alierta que ista “sin solución”, “provocaría uns gastos economicos extras que pueden plegar en os 200 € a o mes entre transporte y minchador. Fería prou dificil a conciliación d’a vida laboral y familiar. Con o contexto actual, isto puede suposar un verdader drama ta muitas familias, plegando a optar por a no escolarización d’as suyas fillas y fillos”.

“Os ninos y ninas de Roseras no son os culpables d’ista situación derivada d’una mala planificación, y se mereixen una solución responsable de man d’o Departamento d’Educación, que prive de totz istos trastornos a las familias, diz Francisco. Por ixo, a Plataforma demanda que Roseras d’a Canal tienga “un colechio nuevo y que s’ixample o que ya bi ha ta que i cullan totz os ninos y ninas d’o vico y asinas poder ir andando t’o cole”.

 

Fuent: http://arainfo.org/2013/04/mas-de-50-ninos-y-ninas-del-barrio-de-rosales-no-obtendran-plaza-escolar-en-su-propio-barrio-y-no-podran-ir-andando-al-cole/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.