Más de cient personas corren o Cross de San Antón

Un total de 112 corredors participón ahiere, domingo, de maitins en o XX Cross de San Antón en Buxaraloz.

Imachen d'a carrera. (Foto: comarcas.es)

A penar d’as baixas temperaturas, a preba ha rechistrau un mayor numero d’inscritos respecto a edicións anteriors y ha habiu un ambient excellent, tal y como ha destacau l’alcalde d’o monecipio anfitrión, Carmelo Rozas.

As categorías benchamín, prebenchamín y alevín han estau as mas participativas con una meya de vente corredors por preba. En categoría absoluta masclina, dimpués de recorrer un total de 4.800 metros, o vencedor ha estau Julio César Simbaña, de Zaragoza; o segundo, Marc Aranda, de Esbufets (Mollerussa); y o terceno, José Jorge Guallich, d’a capital aragonesa. En feminas, a victoria ha estau ta Silvia Baringo, de Hinaco Monzón, que ha cruzau a meta dimpués de completar os 3.000 metros marcaus. En ista mesma categoría, a segunda a estau Esmerlda Cubas, d’o Club Zoiti; y a tercena Marina Castells , d’Esbufets (Mollerusa).

D’o total de participants, os mas chóvens han estau os inscritos en a categoría Popular Aguiluchos, que se corresponde con ninos naixius en l’anyo 2007 y posteriors que han recorriu 50 metros. En cada una d’as categorías, ha habiu trofeyos t’os tres primers y medallas ta la resta de corredors como premio a o suyo esfuerzo y participación.

L’alcalde de Bujaraloz, Carmelo Rozas, ha destacau l’alta participación de corredors locals y ha insistiu en a importancia de “continar promocionando l’esporte y a convivencia” a traviés d’iste tipo d’iniciativas. “A o buen ambient ha contribuyiu a colaboración d’os vecins de Buxaraloz que han ufierto a totz os asistents un almuerzo buenismo a base de productos a la brasa”, ha explanicau Rozas.

A preba, que forma parti d’os XXIX Chuegos Esportivos en Edat Escolar d’Aragón, ha estau organizada por o Concello y a Redolada d’Os Monegros a traviés d’a Fundación ta la Promoción d’a Choventut y l’Esporte. As carreras s’han desenvolicau en as inmediacións d’o campo monecipal. A temporada de cross en Os Monegros continará con as prebas de Lanaxa y Sarinyena con l’animo de “empentar l’esporte, mas que mas, d’entre os más chiquetz y propiciar a convivencia d’esportistas de diferents puntos d’Aragón”, tal y como ha senyalau o consellero comarcal de Choventut y Esporte, Joaquín Monesma. Seguntes a suya opinión, as prebas aduyan a más a “dinamizar os nuestros lugars y dar a conoixer a nuestra redolada”.

Fuent: http://www.comarcas.es/index.php/mod.noticias/mem.detalle/idnoticia.6617/relcategoria./chk.b23deee33716e8d0b0ef991dd29cd792.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.