Matanza de miners en Sudafrica por disparos d’a policía

34 miners morioron por disparos d'a policía en Sudafrica en os enfrentamientos por a vada minera en o país

O president sudafricano, Jacob Zuma. Fuent: Wikipedia

34 miners estioron muertos en Sudafrica por disparos d’a policía en bell meyo d’a vada que mantienen os miners en o país. A matanza se produció en Marikana, en una mina de platino d’a companyía britanica Lonmin. Ye l’operativo policial mas crudel dende 1994 en a fin de l’apartheid.

O domingo pasau prencipioron os enfrentamientos y ya estioron 10 as personas muertas entre miners, policía y guardias de seguridat. Chunto a istas cifras, cal adhibir-ie 78 personas feridas.

A comisaria cheneral d’a policía sudafricana, Riah Phiyega, esfendió l’actuación d’os achents porque, seguntes ella, estioron atacaus con palos, machetes y mesmo armas de fuego, extremo iste desmentiu por os miners, ya que seguntes ells, encara que i heba bells miners con machetes, a gran mayoría portaba nomás palos. A policía ubrió fuego contra os miners indiscriminadament como puede veyer-se en o vidio.

O Congreso nacional Africano (ANC), demandó una investigación policial independient ta aclarir l’ocurriu en una matanza que remeraba os tiempos de l’apartheid mientres o president sudafricano, Jacob Zuma, demandó explicacions a la chefa d’a policía.

O conflicto minero tien como punto de partida l’enfrentamiento entre o sindicato mayoritario NUM y una escisión suya, o sindicato AMCU, amás d’as penibles condicions de vida d’os miners.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.