Maut, a mosica tradicional como nunca no l’has sentida

O disco de Maut estara en noviembre en as botigas y prencipiarán a fer conciertos

O venient mes de noviembre estara en as carreras o disco d’una nueva colla mosical. Se diz Maut y promete fer cambear o panorama d’a mosica tradicional aragonesa. Seguntes os suyos impulsors, Maut ye una colla filla d’iste present incierto que vivimos. Perén s’ha dito que os millors intes historicos a ran creyatiu son as puendas dificils. “Quan l’anviesta cheneral se torna disierto, no bi’n ha diners y no se programan conciertos, t’importa igual lo que ufras mosicalment porque , siga lo que siga, tasament triballarás”, mos diz Diago Lezaún.

Dende ista situgación Maut prencipió a devantar un prochecto nuevo, una colla de mosicos de esferents formacions que quereban tocar por placer y fer a mosica que lis aganase, “querebanos xublidar-nos de si li feria goyo a o publico u no”, mos esplanican. Y asinas naixió Maut, con un zarpau de folkis, un tromponista que i plega de l’Ska-Reggae y se torna guitarrista de distorsión, un baixista que pasaba por allí y un mayestro d’o sampler.

“Nos fiquemos a triballar seguntes devantabamos o disco, ta prencipiar con buen piet. Con un repertorio culliu, quasi de tot, d’a tradición aragonesa como alazet, con una capa dencima de programacions y sintes, y adrezau con guitarras, trompons, clarinetz, trompetas y guitarras con pedalera”

O risultau ye un disco que no deixara indiferent a dengún. 1.0 ye un árbol con fundas radices en a mosica tradicional aragonesa y alteras brancas plenas de fuellas verdas. Ye un disco plen de mudanzas de gaita d’os palotiaus monegrinos, con una mudanza de Yebra “como ye de dar en cualsiquier colla an bi aiga folkis”, riden. Y tamién clasicos revisited como “L’Aurora viella de Sarinyena” y “O reloch d’a Pasión” de Cuervo, pero tamién ye un disco de minimal, bell breakbeat, un sinyalín de dubstep, “macarrismo debant d’a ortodoxia y muito d’ubrir as orellas a la mosica que s’ascuita huei”.

Y como que o video que hemos meso mos dixa con as ganas de sentir-los, aqui tenetz bellas prebas de que Maut estará aire nuevo ta la mosica tradicional y ta la mosica aragonesa en cheneral.

maut – Ya raya l’alba by bazilogaiter

maut – la aurora by bazilogaiter

2 Rispuestas a Maut, a mosica tradicional como nunca no l’has sentida

  1. @gerardoensuisse

    como mola o bazilo sound system !! Asperando que lo quiten ta mercar-lo ascape!!

  2. Ta qui quiera ascuitar maut u seguir-nos a pista, astí dixamos l’adresa d’o nuestro myspace:

    http://la.myspace.com/574856726

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.