Meyo millar de personas piden en Canfranc a reobridura d’a linia

Mas de meyo millar de personas participoron iste domingo en a concentración convocada por Crefco y Creloc a estación de Canfranc pa exichir a reobridura d'a linia en 2020

Foto: Pedalea

Foto: Pedalea

Un acto reivindicativo que cada anyo Crefco y Creloc organizan con motivo de l’aniversario d’a inauguración d’a linia, o 18 de chulio de 1928 y que iste anyo s’emmarca en a obridura en 2016 de 25 kilometros d’a linia entre Olorón y Canfranc. Asinas, Aquitania da un important primer trango t’a reobridura y ya solament en queda 32 kilometros por reubrir dende o Estau francés dica a buega aragonesa.

A convocatoria d’estianyo contó con una representación d’o Gubierno d’Aragón, o consellero de Vertebración Territorial, Mobilidat y Vivienda José Luis Soro.

O nuevo consellero y president de CHA amostró o suyo emparo y agradeiximiento a Crefco por “a labor que desenrolla pa empentar a reobridura” y consideró que “o 2020 ye una calendata factible y a la qual no podemos renunciar”.

O consellero, que se desplazó en o canfranero conoixendo de primera man as prencipals afeccions d’a vía, reclamó a o Gubierno espanyol compromís con ista infrastructura “que a voluntat politica se refleixe en una partida presupuestaria significativa en os proximos Presupuestos Chenerals y con previsión economica plurianyal pa guarenciar que en 2020 a reobridura sía una realidat”.

Unas reclamacions secundadas por a resta de CHA que participó en l’acto con una ampla delegación formada por militants y simpatizants de CHA d’as comarcas d’a Chacetania y a Plana de Uesca, o President d’os aragoneses emigrants en Madrit, Chusé Inazio Felices, u José Manuel Cazorla, portavoz de CHA en Puebla d’Alfindén, como muestra de l’emparo que dende tot Aragón quiere dar-le CHA a ista reivindicación.

Dica Canfranc tamién se desplazoron os diputaus y diputadas de Podemos Aragón Pablo Echenique, Violeta Barba, Nacho Escartín y Marta de Santos que expresoron o suyo compromís con a reobridura d’a linia de ferrocarril Canfranc-Olorón.

Os diputaus y diputadas de Podemos consideran ista reobridura “de primera necesidat” pa asegurary amillorar a vertebración d’o territorio” d’Aragón. “Dende Podemos Aragón, s’achuga por as obras publicas viables economicament y sostenibles medioambientalment que puedan suposar una millora substancial tanto pa os habitants como pa lo teixiu productivo d’Aragón, como ye o caso d’a reobridura d’o tunel de Canfranc”, afirmoron.

Podemos Aragón y o suyo Grupo Parlamentario exichen a o Gubierno espanyol y a o Gubierno d’Aragón que achuguen “sin meyas tintas” por milloras en o “canfranero” frent a “macroprochectos de transporte de dubdosa viabilidat y de mayor coste”, en referencia a la Travesía Central d’o Pirineu.

Pablo Echenique acudió ta Canfranc en o suyo vehíclo particular, dau que a estación de dito municipio no ye accesible ta personas con mobilidat reducida. “Ista situación, que se repite en muitas atras estacions de municipios aragoneses, ye conseqüencia de l’achuga por un modelo ferroviario que ha desatendiu os retz rechionals y, por tanto, as necesidatz d’o territorio”, criticoron.

Por a suya parte Izquierda Unida acudió ta Canfranc con una delegación encabezada por o suyo Coordinador d’IU Alto Aragón, Miguel Aso, que reiteró a necesidat d’a reobridura en 2020 porque “ye viable economica y medioambientalment, cal pa la vertebración d’o nuestro territorio y pa reactivar a nuestra economía”.

Aso, que fue portavoz de Transportes en as Cortes d’Aragón por IU en a pasada lechislatura, lamentó l’albandono de l’anterior Gubierno aragonés d’o Canfranc y aspera que o nuevo Executivo considere o prochecto “prioritario” y le dote de l’empento necesario pa la suya reobridura en 2020.

De feito, recuerda a diputada d’IU, Patricia Luquin, una d’as 35 midas acceptadas por o PSOE aragonés pa l’alcuerdo d’investidura d’o socialista Javier Lambán como nuevo president d’a DChA ye “una achuga decidida por o Canfranc”.

“Ye fundamental no deixar o prochecto en vía muerta como ha feito PP y PAR y treballar con l’obchectivo d’establir un cronograma pa la reobridura de traza urchent, incluir inversions suficients dica ixa calendata y convencer a Francia y Europa d’as necesidatz d’ista linia transfronteriza”, asevera Luquin pa reiterar que “no sirven as promesas, porque ista infrastructura ye vital pa la vertebración d’o nuestro territorio y a reactivación economica y pa ixo cal un presupuesto y un calandario que guarencie a reobridura d’o Canfranc en 2020”.

Fuent: http://arainfo.org/2015/07/medio-millar-de-personas-piden-en-canfranc-la-reapertura-de-la-linea-en-2020/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.