MHUEL exiche en Zaragoza “un estau laico, igualitario y republicano”

Os manifestants demandoron que se crebase o Concordato y os alcuerdos de l'estau espanyol con o Vaticano

mhuelIste, domingo 1 d’aviento, aprofeitando que s’amana o cabo d’anyo d’a Constitución espanyola, o Movimiento enta un Estau Laico (MHUEL) remeró en Zaragoza que l’actual constitución “no representa a lo pueblo”, y exichió “a declaración d’un estau laico, igualitario, que respetase a libertat de conciencia y republicano”.

Un ciento de personas estioron en a concentración convocada por o colectivo laicista en Zaragoza, a on que antimás de reivindicar “una constitución laica a on que todas sigamos iguals debant d’a lei” y dimpués de leyer un texto a on que s’exichiba cambios constitucionals, qui bi yeran podioron “gronxiar-se con a carga emotiva y revolucionaria d’o repertorio d’o Coro Libertario de Torrero”.

Cal remerar que l’asociación MHUEL tien una activa presencia en as luitas popular aragonesas, más que más en lo que pertoca a la esfensa d’os dreitos humanos, centrando a suya actividat en a ciudat de Zaragoza. Dende MHUEL explican que “qui integramos y refirmamos MHUEL no somos d’alcuerdo con o papel que o catolicismo espanyol, y más que más a suya cherarquía, ye estau tenendo y contina tenendo en l’aria educativa, politica, social, economica y moral. Por ixo, queremos que s’anulen de tot y de camin o Concordato y os Alcuerdos Vichents con l’Estau d’o Vaticano que dan una serie de privilechios a la Ilesia Catolica que atentan contra o prencipio basico d’igualdat y no discriminación en razón de creyencias”, y reafirman o suyo respeto por “o dreito que tien tot ciudadano y ciudadana a las suyas creyencias, costumbres y tradicions, tamién as relichiosas, pero consideramos que istas creyencias perteneixen a lo privau de cadagún y, alavez, no han d’interferir en as institucions publicas.”

Dende MHUEL rematan remerando que entre os obchectivos d’o suyo colectivo i ye treballar por “una sociedat institucionalment laica; que no sigan presents as nuestras institucions publicas y os nuestros representants politicos, en calidat de tals, en garra acto pertenecient a una confesión relichiosa; una escuela publica y laica; vulcar o Concordato y atros alcuerdos entre l’estau espanyol y o Vaticano; y tornar o patrimonio artistico- cultural d’a ilesia t’o pueblo”.

 

Fuent: http://arainfo.org/2013/12/mhuel-exige-en-zaragoza-un-estado-laico-igualitario-y-republicano/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.