Microsoft s’adapta a la realidat movil y tactil con o Windows 8

A companyia informatica lanza a principal actualización d'o suyo sistema operativo dende Windows 95 y presenta a loseta Surface.

Imachen de l'escritorio de Windows 8 (Fuent: Wikipedia)

Imachen de l’escritorio de Windows 8 (Fuent: Wikipedia)

Dimpués de meses d’anuncios y presentacions (en Barcelona, Las Vegas, Los Angeles…) o chigant informatico Microsoft lanzó o chueves o Windows 8, o redisenyo de raso d’o sistema operativo d’o 90% d’os ordinadors personals. Con a principal renovación dende o Windows 95, a companyía menada por Steve Ballmet preba de dentrar de tot en as losetas y a movilidat, a on que os rivals ya fa tiempo que i son presents. O Windows 8, que se comercializa dende o viernes, presenta una interfaz “reimachinada” a on que tienen más importancia as aplicacions, y a la experiencia de navegación con teclau u churi, se i suma la d’un lapiz dichital u la tactil.

Con tot ixo se preba de potenciar un sistema dual, endrezau tanto a l’ordinador de mesa como a los dispositivos portatils, ta mirar de concarar-se con os competidors como Apple y Samsung, que ya fa tiempos que han desembarcau n o mercau d’as losetas tactils. A Microsoft le cal reorientar o negocio, contando que o PC no vive o millor inte. Os consumidors y o sector interpresarial prencipian a migrar a una nueva cheneración de dispositivos, servicios y contenius d’entretenimiento basaus en a boira. Son prou graficos os resultaus anunciaus por o chigant de Redmond o 18 d’octobre: l’esquilmen cayó un 22% de chunio ta setiembre, más que más por a desaceleración en a venda d’ordinadors.

A respuesta de Microsoft, alavez, ye un sistema operativo que incorpora una conexión perén a internet, de traza que totz os datos se pueden almagacenar automaticament en a boira y se puet acceder-ie dende qualsiquier dispositivo y puesto. Una atra d’as novedatz sinyaleras ye que disapareix o botón de Prencipio. Tot isto fa d’o Windows 8 l’esvielle más important de Microsoft en a demba d’os sistemas operativos dende Windows 95, que estió seguiu por o Windows 98, o 2000, o XP, o SErver 2003, o Vista y o 7.

O Windows 8 surtió ahiere o mesmo diya a on que Microsoft presenta en San Francisco a suya propia loseta, Surface, que funcionará en bella versión con Windows 8, pero más que más con Windows RT, un sistema operativo más lichero y menos compatible con os programas de versions anteriors de Windows.

Surface presenta respecto a os competidors bellas quantas novedatz, como a presencia de puertos USB, un teclau integrau ta producor contenius de camín y una base ta que se pueda meter sobre superficies.

Y o Windows Phone 8, o lunes

Os engueros de Microsoft no s’aturan con o lanzamiento de Windows 8 y l’anuncio d’a loseta Surface. Mientres istos diyas tamién s’actualizau a consola Xbox 360 y o lunes venient se presentará o Windows Phone 8 en San Francisco, a on que s’aspera que se anunciará la calendata ta que apareixcan os primers dispositivos de HTC, SAmsung y Nokia que lo incorporarán

 

 

Fuent: http://www.vilaweb.cat/noticia/4050272/20121025/microsoft-sadapta-realitat-mobil-tactil-windows-8.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.