Miles de manifestants contra a reforma laboral

As principals ciudatz aragonesas han estau scenario d'o refus a los retalles socials

Imachen d'a primer pancarta (Foto: Primo)
Imachen d’a primer pancarta (Foto: Primo)

Miles de personas s’achuntoron ahiere en as manifestacions y actos convocaus en as principals ciudatz aragonesas en refus d’a reforma laboral que ha planteyau o gubierno espanyol. Antimás de CC.OO. y UGT, atras organizacions, u movimientos socials como o 15M, s’han sumau a las protestas, por un regular con criticas a los dos sindicatos con más afiliaus.

En Zaragoza, a manifestación prencipiaba con una pancarta con o lema ‘Gubernar Europa significa más treballos, más chusticia y solidaridat. No a los retalles socials’ y representants d’os sindicatos mayoritarios, partius politicos (PSOE, CHA y IU) organizacions chobenils u a Federación de Vicos (FABZ). Remató sin garra incident en a siede d’a D.Ch.A. Con tot y con ixo, bells manifestants d’o clamau ‘bloque critico’ continoron a manifestación por as carreras zaragozanas dica plegar en o concello y acompanyaus por buena cosa de policia nacional.

Antimás d’os más de diez mil zaragozanos, atras ciudatz tamién acullioron manifestacions. En Uesca bellas mil personas marchoron dende a Plaza Cervantes, entre que Teruel en achuntaba a bells cientos con una manifestación dende a Plaza d’a Catedral. En os dos puestos un bloque critico fació atras actividatz mientres y dimpués d’a manifestación. Chaca y Alcanyiz estioron tamién scenario d’actos contra a reforma.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.