Miles de personas contra os entibos y a represión en Zaragoza

Os manifestants protestaban contra os entibos de Biscarrués, Mularroya y Yesa y contra a imputación de personas por a enrestida d'a Guardia Civil en Artieda

Os imputaus en a Plaza d'a Seu

Os imputaus en a Plaza d’a Seu

Iste sabado miles de personas s’han manifestau por as carreras zaragozanas contra a politica hidrolochica d’os gubiernos espanyol y aragonés y contra a imputación de ueito personas por os feito que acayecioron en Artieda o pasau 10 d’octobre. Se i amostraba o refús t’o recreiximiento de l’entibo de Yesa y t’atras obras hidrolochicas como os entibos de Biscarrués y Mularroya. A manifestación ha rematau debant d’a Seu de Sant Salvador con a lectura de bells manifiestos.

Os actos reivindicativos prencipiaban a las 11 d’o maitin quan tres columnas de chent saliban dende a Plaza d’a Madalena, a Plaza Sant Francho y a Plaza d’as Canteras endrezando-se t’a siede d’a Confederación Hidrografica de l’Ebro (CHE) en a zaragozana Gran Vía. Entre os manifestants, representants d’afectaus por Yesa, Mularroya u Biscarrués y organizacions y personas en solidaridat con istas luitas Colada a meya d’as dotze, as tres columnas se i chuntaban, entre  chilos contra os entibos y contra os que sinyalan como responsables d’as enrestidas d’a Guardia Civil en Artieda: Xavier de Pedro, president d’a CHE y Gustavo Alcalde, delegau d’o gubierno espanyol en Aragón. Mientres bell poco más d’una hora, a manifestación i ha remaniu con diferents accions como cantas a cargo d’o coro d’a Republica Independient de Torrero y una lectura de poemas de José Luis Clemente. Antis de prencipiar a movers-se s’han leyiu bells textos, a cargo de Luis Solana, president de Río Aragón, que ha feito remeranza de lugars afectaus por os entibos y as suyas conseqüencias y ha criticau a politica hidraulica d’a CHE; un representant d’a Plataforma en Defensa de l’Ebre, que ha sinyalau que con os esferents entibos pirinencos son parando un futuro trescole de l’Ebro y ha advogau por a unidat en a cuenca de l’Ebro entre nabarros, riochanos, aragoneses y catalans en a luita contra os entibos; y una emocionant carta d’una mai d’Artieda, endrezada t’os fillos suyos.

Antimás d’as pancartas principals, protagonizadas por os afectaus, muita chent en portaba atras remerando diferents aspectos d’os efectos d’a politica hidrolochica. Bi’n heba contra o malfurrie de diners en tiempos de crisi, sobre os lugar albandonaus ya d’antismás, u sobre a falta de democracia y partipación d’o pueblo en a politica hidrolochica.

A manifestación ha prencipiau alavez a endrezar-se ent’a Plaza d’o Pilar por o Paseu d’a Independencia, ya con toda a chent arroclada. En plegar t’a siede central d’a Ibercaja se i ha trobau con atra manifestación, en iste caso de treballadors de Caja3, que protestaban contra os posibles despidos, en estar ista entidat mercada por Ibercaja.

Entre os manifestants bi heba gaiters y donzainers, a campana de Biscarrués tanyendo de cabo ta quan y mesmo un palotiau. En plegar t’a Plaza d’a Seu, s’han prencipiau a leyer manifiestos en esfensa d’a tierra, en contra d’os debanditos entibos y d’a imputación de ueito personas (seis d’ellas ya han declarau en os chudgaus) por os feitos d’o 10 d’octobre en Artieda. A manifestación ha rematau charrando un portavoz d’os imputaus, o periodista Jose Luis Trasobares y con a canta “La Habanera Triste” de La Ronda de Boltaña de man d’o coro d’a Republica Independient de Torrero, que toda la plaza ha cantau de conchunta.

Refirmando a manifestacion i yeran, prou que sí, os afectaus por as obras hidrualicas como COAGRET, Jalón Vivo, Río Aragón u a Coordinadora Biscarrués – Mallos de Riglos, pero tamién organizacions politicas como CHA, Puyalón u Equo, ecolochistas, socials y de toda mena. Mesmo i son plegaus personas de Catalunya, d’as tierras de l’Ebro u de Navarra, afectaus tamién por Yesa y por l’entibo d’Itoiz.

Un choven leye un manifiesto

Luis Solana, president de Río Aragón debant d’a CHE

 

A columna d’a Madalena plegando en Glorieta Sasera

 

 

 

 

 

 

 

 

 

Os manifestants debant d'a siede d'a CHE

Os manifestants debant d’a siede d’a CHE

A manifestación por o Paseyo Independencia

A manifestación por o Paseyo Independencia

 

Anvista d’a manifestación en o Paseyo Independencia

 

Mas pancartas en a Seu

Mas pancartas en a Seu

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.