Miles de personas esfienden o gallego por as carreras de Santiago

Protestas contra as midas ta achiquir a presencia d'o gallego en l'amostranza

A manifestación (Foto: Galicia Confidencial)

A manifestación (Foto: Galicia Confidencial)

Qualques miles de personas fuoron iste domingo baixo a plevia t’a manifestación de «Queremos Galego» en Santiago (Galicia). Os ciudadans demandoron t’a Xunta que retirase o polemico «Decreto d’o Plurilingüismo», que por primera vegada en a historia preba de achiquir a presencia d’o gallego en as aulas.

En o discurso final, o president d’a «Mesa pola Normalización», Carlos Callón avisó a o PP que en «Queremos Galego» i participan organizacions de todas as dembas fueras d’os propios conservadors. O portavoz tamién enristió contra o prochecto estatal de reforma de l’amostranza, que clamó «Lei d’a Wergonya», en referencia a o ministro d’Educación espanyol.

No bi habió incidents en una marcha que fue dende l’Alameda dica a Plaza d’a Quintana de Compostela. Os asistents, entre qui bi heba muita chovenalla, consiguioron plenar-la en un diya de tronada. Con tot y con ixo, bi habió menos chent que en pasadas movilizacions de «Queremos Galego», a on que se plegó a plenar a Plaza de l’Obradoiro.

Callón remató a suya intervención remerando a o falleciu Avelino Pousa Antelo, qui estió portavoz en anteriors movilizacions. A concentración remató con l’himno y chilos de «Na Galiza, en galego!» y «Independencia!».

Fuent: http://galiciaconfidencial.com/nova/13025.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.