Mils de personas en Aragón amuestran o suyo refirme a o vico de Gamonal

En Zaragoza, Uesca y Teruel se realizoron concentracions en refirme. En Zaragoza se producioron cargas policials y detenius

Foto: Arainfo (CC-BY-SA)

Zaragoza. Foto: Arainfo (CC-BY-SA)

Ahiere millars de personas amostroron o suyo refirme a la luita vecinal d’o vico burgalés de Gamonal, que aconsiguió a paralización definitiva d’as obras d’o bulevar d’a carrera Vitoria, seguntes anunciaba ahiere de tardes l’alcalde de Burgos Javier Lacalle.

Solidaridat dende Teruel

Foto: Arainfo (CC-BY-SA)

Teruel. Foto: Arainfo (CC-BY-SA)

En Teruel qualques decenas de personas se concentroron convocadas por o Bloque Critico de Teruel. Seguntes informa Arainfo, en a concentración s’ha denunciau as “obras innecesarias” realizadas en o centro historico d’a ciudat, denunciando o suyo excesivo coste que han estau “a punta d’o iceberg d’o saqueu a os dreitos socials y civils, todas istas obras han veniu de man d’os partius d’o rechimen, PP, PSOE y PAR, que han chenerau una deuda publica ilechitima y que hue fan honra de sincusa pa retalles a totz os nivels: municipal, autonomico y estatal”.

As personas concentradas, en a Pza. Domingo Gascón, han rebaltizau un edificio sin uso en dita plaza, que costó 7 millons d’euros como “Edificio Gamonal, denunciando a lochica capitalista que nos ye arrebatando os nuestros dreitos”.

Refirme dende Uesca

Foto: Arainfo (CC-BY-SA)

Uesca. Foto: Arainfo (CC-BY-SA)

Arredol de 200 personas se concentroron en a Pza. Nabarra de Uesca convocadas por o Bloque Anticapitalista. Mientres a concentración s’han ascuitau chilos en solidaridat con o vico de Gamonal asinas como demandando a libertat d’as personas detenidas en as diversas protestas realizadas en diferents puntos d’o Estau mientres ista semana. S’ha leyiu un comunicau y as personas presents han puesto fablar y expresar-se a traviés d’o megafono en rematar a lectura d’o comunicau.

2.000 personas se manifiestan en Zaragoza

As ceras d’o Paraninfo d’a Universidat de Zaragoza a escape se quedoron chicotas pa las arredol de 2.000 personas que se querioron solidarizar con a causa de Gamonal. A concentración se convirtió en manifestación improvisada que salió ent’o Paseu Independencia en dirección a Delegación d’o Gubieno espanyol en Aragón y a ribera d’o Ebro.

Mientres a concentración, y antes d’a manifestación, s’ha leyiu un comunicau refirmando a luita de Gamonal y a suya valor, asinas como criticando que en tiempos de crisi se quiera realizar una obra d’ixas caracteristicas por 8 millons d’euros: “una vegada mas, s’ha pretendiu de pasar por alto d’os dreitos participativos, y a conseqüencia ha habiu d’estar a movilización social y a luita en a carrera, qüestión que recuerda a la epoca d’a transición y que fa retroceder a la nuestra sociedat 25 anyos”. “En os momentos en que vivimos, no se puede compartir a decisión de proceder a un gasto de 8 millons d’euros de vez que se reducen prestacions y servicios socials, escuelas u guarderías, transporte, etc.”.

Asinas mesmo, seguntes publica Arainfo, tamién s’ha criticau “a represión policial, y as manifestacions de qualques cargos publicos que veyen una supuesta violencia, y mesmo gosan a calificar-la de terrorista, segurament pa esvarrar l’atención d’as suyas propias responsabilidatz, y sin conoixer quálas son as causas ni valurar a resta d’as actuacions vecinals realizadas”.

Dimpués d’o comunicau as concentradas salioron en espontania manifestación por Paseu Independencia tallando totz os carrils de circulación, mesmo o servicio d’o tramvía, chirando enta carrera Alfonso y arribando a la Pza. d’o Pilar. En a Delegación d’o Gubierno espanyol asperaba un fuerte dispositivo policial.

Foto: Arainfo (CC-BY-SA)

Cargas policials en Zaragoza. Foto: Arainfo (CC-BY-SA)

A marcha s’ha endrezau ent’a ribera d’o río Ebro pa alcanzar a carrera Sant Vicent de Paúl y o vico d’a Magdalena. En as carreras d’iste vico os antidisturbios han tallau o recorriu d’a manifestación de bote y boleyo y a policía realizó cargas que rematoron con contenedors vulcaus en o preto d’as carreras y mesmo cremaus. As manifestants improvisoron barracalas en bell medio d’iste vico y a policía plegó a disparar pilotas de goma, bella cosa que en fa de tiempo que no se viyeba. Iste vico d’o centro historico zaragozano yera preso por os antidisturbios. Finalment quatro personas estioron detenidas y un manifestant resultó nafrau.

As manifestants acusan a la policía “d’ir de caza de manifestants” por as carreras d’o vico y critican l’actuación policial. Organizacions y asociacions vecinals tamién han amostrau o suyo refuse a l’actuación d’os antidisturbios.

Tanimientres, as quatro personas detenidas son acusadas d’os cargos de desorden publico y danyos en moviliario urbano y autos policials. Una d’as suyas advogadas ha denunciau que as detencions han estau de traza “arbitraria, aleatoria y indiscriminada“. Una d’as detenidas presenta feridas debiu a la carga. Os detenius podrían estar liberaus sobre as 18 h. d’ista tarde seguntes zagueras informacions. Por o rete se clama a realizar una concentración de refirme en os chudgaus d’a zona Expo asinas como unatra concentración a las 20 h. en o Paraninfo.

Refirme en a resta d’o Estau

En a resta d’o Estau espanyol se vivioron tamién concentracions en refirme a Gamonal que rematoron en bell caso con enfrontiamientos con a policía y detencions. En Valencia i habió cargas y quatro detencions. En Alicant se producioron atras tres detencions. En Madrit cinco personas estioron detenidas en a tercera nueit de protestas, mientres que en Barcelona se plegó mesmo a enrestir a comisaría d’a Guardia Urbana de Ciutat Vella. Os mossos d’esquadra facioron servir canyons de soniu (LRAD) por primer vegada pa disolver a manifestación. Tres personas estioron detenidas. En un buen zarpau de ciudatz d’o Estau como Granada, Zamora u A Corunya tamién se realizoron concentracions de refirme.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.