Mils de personas se plantan contra as prebas d’a LOMCE

Alto u baixo, seguntes o sindicato CGT, un 25% de profesorau ha refirmau a vaga en Primaria y Secundaria. As prebas d'evaluación de 3º de Primaria s'han visto afectadas

Manifestación contra a LOMCE en Zaragoza. Foto: @arainfonoticias

Manifestación contra a LOMCE en Zaragoza. Foto: Pablo Ibáñez (AraInfo)

Son ya tres anyos de manifestacions, enzarres y protestas contra una lei que s’ha imposau sin parar cuenta en a comunidat educativa. “Hue no yera un día mas en iste largo caminar d’oposición a la LOMCE”, afirmaba o sindicato CGT, convocant chunto a organizacions estudiantils y Marea Verda d’a chornada de vaga en Aragón.

Una vaga que ha feito honra, en parolas d’as organizacions, pa respaldar o boicot de muitas familias a las prebas de revalida pa 3º de Primaria aprebadas con a lei Wert. “Hue seguimos dicindo ‘no a la LOMCE’ y pedimos a suya no aplicación en Aragón, invalidando as prebas d’evaluación que se son realizando en 3º de Primaria”, asevera o sindicato.

25% de seguimiento

Seguntes datos de CGT, o seguimiento d’a vaga por parte d’o profesorau aragonés ha estau arredol d’o 25% de media. CGT destaca un seguimiento muit dispar”, dende o 100% en centros como o CP Alpartir y o Val de Atalaya en María de Uerva, o 70% en El Espartidero u en o Hermanos Marx de Zaragoza do amás no s’han puesto celebrar as prebas, y o 60% en o Colechio de Quinto. En atros centros o seguimiento ha estau inferior, entre o 10 y o 20% u o 30% de media en Graus en os tres centros.

“Diez d’os 24 profesors d’o CEIP de Pedrola han aturau iste mierques emparando a vaga y tant solament once ninos y ninas de 33 ha realizau as prebas”, explica un representant d’o sindicato en declaracions a AraInfo. “Mesmo nos han plegau informacions de centros do ha habiu d’estar a Inspección Educativa a que realizase as prebas debant de l’ausencia d’os y as mayestras”, adhibe.

CGT valora istes datos de traza muit positiva ya que l’obchectivo d’a vaga yera invalidar as prebas de tercero de Primaria” y os paros “han contribuiu de traza decisiva a que o desembolicamiento d’a evaluación no sía normal” ya que “no se va a contar con datos totals d’os centros”.

3.000 personas se manifiestan en Zaragoza

Un d'os bloques d'a manifestación en Zaragoza. Foto: Pablo Ibáñez (AraInfo)

Un d’os bloques d’a manifestación en Zaragoza. Foto: Pablo Ibáñez (AraInfo)

Docents, familias y estudiants s’han plantau de traza unitaria contra a imposición d’as prebas y han participau en as diversas convocatorias realizadas en Aragón. “Comprometendo-nos una vez mas por a educación publica, porque creyemos que a educación y a suya normativa ha d’estar fruito d’a participación y d’o debat de totz os components d’a comunidat educativa”, subraya CGT.

En Zaragoza, 3.000 personas -seguntes CGT- s’ha manifestau dende a Gran Vía frent a la siede d’o Partiu Popular -do s’ha realizau una performance– pa continar dimpués dica a siede d’o PAR -socio de gubierno d’o PP- en o Coso, fuertement custodiada por unidatz d’antidisturbios.

En iste sentiu, dende CGT denuncian l’actitut d’a Policía espanyola que en finalizar a manifestación no deixaban retirar-se a un grupo numeroso d’estudiants, plegando mesmo a sobrevolar un helicoptero a o grupo d’estudiants”.

A la fin d’a manifestación s’han sumau, y han leito un comunicau, tres representants d’a caravana europea d’os 43 estudiants mexicanos desapareixius en Iguala (Guerrero), fa 7 meses, que hue imparten una conferencia en a Universidat.

Tamién s’han realizau actos contra a LOMCE en Graus, Andorra, Samianigo, Calatayut, Alpartir, Tarazona, Uesca y Teruel.

Quan tasament queda tres semanas pa dicir adiós a o gubierno y a la consellería, qualificaus por o sindicato como os “mas nocivos que ha teniu a educación aragonesa en a suya historia mas recient”, CGT, Marea Verda y as organizacions estudiantils recordan que en istes quatro anyos s’han sufierto retalles en a escuela publica y o que consideran encara mas grieu, en a calidat educativa d’os centros. Amás denuncian a ista administración por “haber favoreixiu descaradament a la educación concertada catolica”.

“Por tot ixo y una vez mas, a comunidat educativa unida ha tornau a exichir a no aplicación d’a LOMCE y d’a evaluación que proposa y a immediata dimisión d’a consellera Dolores Serrat y d’o ministro Wert”, concluyen.

Iste chueves, a las 9.15 horas, s’ha convocau una concentración en a puerta d’as Cortes de Zaragoza pa recibir a Dolores Serrat en a suya compareixencia do s’aspera que dé explicacions por a privatización de Machisterio.

Fuent: http://arainfo.org/2015/05/miles-de-personas-se-plantan-contra-las-pruebas-de-la-lomce/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.