Mosica tradicional de nueva composición u mosica “tradicional-contemporania”

Pepín Banzo

Toda composición musical, incluida a tradicional, tiene u ha teniu autor u autors (encara que pueda quedar en l’anonimato) y ha pasau a estar patrimonio colectivo mientres ixa comunidat l’ha reconoixiu y asumiu como suya. Por tanto, si o repertorio tradicional s’ha feito de melodías y propuestas en o pasar d’os anyos, no podemos mantener-lo estanco, sino tot lo contrario, ye necesario dar oportunidat a nuevas propuestas. Ye a partir d’aquí, tal como comentaba en articlos anteriors, quan a sociedat habrá de dirimir entre o que incorporará y o que no a o suyo patrimonio musical, y por tanto, que de tot transmitirá a cheneracions futuras.

En os zaguers decenios d’o sieglo XX y mientres que o sieglo XXI o creixent intrés por a mosica tradicional s’ha multiplicau significativament. Iste aumento, ha chenerau a obridura d’un nuevo sector economico con a fabricación y venda d’instrumentos ta poder interpretar-la. Pero en l’actualidat nos trobamos con un inconvenient: I hai interpretes, i hai instrumentos, pero manimenos solament as viellas composicions y qualques obras creyadas recientment sirven ta dar salida a iste movimiento de revalorización. Por tanto, se puede afirmar que iste incremento ha levau paralelament con ell la demanda de nuevas melodías y tonadas que puedan servir ta enamplar o repertorio.

Un d’os eixemplos mas significativos sobre a buena situación que ye vivindo a mosica tradicional actualment en Aragón, ye l’aparición en os zaguers cinco anyos de dos concursos de composición de mosica tradicional como son os de Belchite y Exea d’os Caballers. Ditos concursos, encara que novedosos aquí, s’han veniu desembolicando entre decenios en Galicia, Catalunya, Valencia, Pais Vasco… como vía de rebilcar de l’instrumento y d’a propia mosica tradicional.

En o caso d’Aragón, o prochecto pionero estió o “Concurso de Composición y Recuperación de Música Popular Aragonesa Comarca Campo de Belchite”, que gracias a o treballo y rasmia de personas como Inazio Navarro iste anyo ha celebrau a suya VII Edición y en o qual, dica a calendata, s’han presentau mas de ciento cinco piezas de nueva composición.

Mas recient ye o “Premio de Composición de Música para Gigantes Comarca de las Cinco Villas”, que se fació por primer vegada en 2010, enchegau por l’Asociación Cultural Gaiteros d’as Cinco Villas y l’Asociación Cultural Comparsa de Gigantes de Exea. O suyo obchectivo ye o de empentar, promocionar, dignificar y enriquir o repertorio d’as comparsas de chigants d’Aragón.

Como mosico tradicional, deseyo que istas dos iniciativas sían a simient de futuros prochectos que sirvan ta empentar a creyación de nuevas composicions tradicionals. Porque ye necesario empentar istos campos dentro d’a mosica tradicional en Aragón, ya que a reinvención y creyación de nuevas melodías y a suya posterior interpretación suposarán un important revulsivo en o sector contribuindo a la suya adaptación y pervivencia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.