Mozilla y Softaragonés presientan a versión oficial de Firefox en aragonés

O software se puet descargar de baldes dreitament en aragonés

Imachen d’a web oficial d’a Fundación Mozilla (http://www.mozilla.org/an/)

Imachen d’a web oficial d’a Fundación Mozilla (http://www.mozilla.org/an/)

A fundación Mozilla presentó ahiere a versión 27 de Firefox, o suyo conoixiu navegador d’internet, que inclui, por primer vegada, una versión oficial en aragonés, desembolicada en colaboración con un equipo de localizadors de Softaragonés.

A primer fita aconseguida por iste grupo de treballo estió a creación d’un paquet d’idioma aragonés que permite meter o Firefox en aragonés, dimpués s’haberlo instalau en belatro idioma. Seguntes os datos de Mozilla, dende que se publicó en 2012, iste paquet ha teniu 4500 descargas y instalacions.

Dende ahiere, os fablants d’aragonés, tamién podemos descargar de baldes iste software de codigo libre, dreitament en a nuestra luenga, en qualsequier ordinador con sistema operativo Windows, iOS (Apple) u Linux.  Mozilla ha acompanyau ista presentación con a publicación en aragonés d’a suya pachina web principal, que antiparte de mantener esviellau o software, permitirá conoixer en aragonés os productos y noticias d’ista fundación sin afán de lucro, antiparte de dar-le a l’aragonés una important visibilidat internacional. Como curiosidat, a versión de Firefox en aragonés amaneix de conchunta con a versión en luenga Xhosa (parlada por un 18% d’a población de Sudafrica, y luenga materna de Nelson Mandela).

Seguntes manifiestan os miembros de Softaragonés, pa plegar en ista fita ha caliu un treballo contino en istos zaguers meses. No nomás han habiu de mantener y esviellar os paquetz d’idioma, sino tamién embrecar-se en os procesos de control de qualidat y producción d’un software y d’una organización d’ista mena.  Tamién indican dende Softaragonés que tienen atros prochectos en camín (entre atros, a versión pa mobils d’o navegador).  Los aguardamos en candeletas.

2 Rispuestas a Mozilla y Softaragonés presientan a versión oficial de Firefox en aragonés

  1. Una chicota correción, a version ta Apple ye a de OS X (escritorio) en cuentas de iOS (dispositius mobils).

  2. Pingback: Mozilla y Softaragonés presientan a versión oficial de Firefox en aragonés | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.