Municipios d’a compleganza d’o Galligo creyan o “Movimiento LindaNO” pa denunciar “l’ocultismo” d’as administracions publicas

Dende iste movimiento s'exichen midas pa descontaminar o río Galligo y evitar a contaminación en a cadena alimentaria y que sigan afectadas as suyas actividatz economicas

Asambleya constituyent en Biscarrués. Foto: Movimiento LindaNO

Asambleya constituyent en Biscarrués. Foto: Movimiento LindaNO

Concellos d’a compleganza d’o río Galligo, chunto a vecins y vecinas d’istas localidatz, s’han uniu pa creyar o “Movimiento LindaNO”. En a tarde d’ahiere, dimpués de celebrar una asambleya constituyent en a localidat de Biscarrués, o movimiento “Lindano NO”, explica que a suya creyación como ferramienta “social debant d’o problema de contaminación d’o Lindano”. En ista primer reunión participoron “vecins, alcaldes y concellers d’os lugars de l’eixe d’o Galligo – de Candearenas ta Villamayor – , de Monegros y d’a Sotonera”, explican.

“Somos os afectaus d’o problema y denunciamos una gran falta d’información por no dicir ocultismo d’as administracions. Sufrimos os picos de contaminación, as nyapas pasacheras, quan o que queremos son solucions definitivas a curto, medio y largo plazo. Hue somos pagando o problema d’o lindano con a nuestra salut, a nuestra augua de boca, o nuestro ecosistema, o nuestro turismo y como isto siga lo pagaremos con a nuestra ganadería, a nuestra agricultura,…,”, indican en as suyas declaracions.

Dende a nueva plataforma popular pretenden d’unir a totz os lugars d’a compleganza d’o Galligo y a os suyos usuarios directos, “os que bebemos d’ell, os que vivimos d’ell, os que treballamos con ell”. Y sumar as demandas dende Samianigo ta Zaragoza u dende d’a Sotonera ta Monegros. “Montanyana, Penyaflor, Villanueva, Zuera, Villamayor, Ardisa, As Penyas de Riglos, Lupinyén, Almudevar son entre muitos atros lugars que d’una traza u unatra tienen a la suya población dependient d’o río Galligo. Se calcula unas 60.000 personas afectadas u menazadas dica as puertas de Zaragoza, y con ellas os suyos correspondients ingresos fuent d’o turismo, ganadería, agricultura, piscicultura. Y d’o Galligo, fluye o lindano ta l’Ebro, habrá plegau o lindano ta Mequinenza?”, se preguntan.

“Exichimos uns abasteiximientos alternativos pa l’augua de boca pero mas que mas un firme compromís mesurable (con recursos economicos) pa la descontaminación de totz os focos de contaminación y d’o río Galligo pa erradicar o problema antes que no plegue en a cadena alimentaria. Pretendemos l’acceso a una información transparent por parte d’as administracions que feremos plegar a toda a población afectada. Pedimos estudios sobre a nuestra salut y restitución territorial por os danyos causaus por o mayor problema medio ambiental d’Europa”, reclaman dende o nuevo colectivo popular.

O movimiento “LindaNO” s’organiza en comisions de treballo, con vocals de todas as comarcas afectadas pa arribar, seguntes explican, a aconseguir istes obchectivos: formación ciudadana treballando en a divulgación d’a información a nivel local con a creyación d’un boletín pa conscienciar d’o grieu problema d’a contaminación d’o lindano y sumar-ie refirmes vecinals, asociativos y politicos.

En a reunión d’ahiere destacó “a gran unión popular chenerada arredol d’o problema d’o Lindano”, indican qualques d’as presents, que anyaden “se criticoron as recients declaracions d’o consellero de Sanidat acusando a la chestión municipal d’un problema d’enverenamiento masivo”. Asinas mesmo, anuncian pa o martes 25 de noviembre, una presentación debant d’a prensa d’o “Movimiento LindaNO”.

Fuent: http://arainfo.org/2014/11/municipios-de-la-cuenca-del-galligo-crean-el-movimiento-lindano-para-denunciar-el-ocultismo-de-las-administraciones-publicas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.