Murcia s’adhibe a Valencia y demanda o rescate a l’estau

22 julio, 2012 | Economía | Autor: Arredol | Tweet

O president d’a Comunidat de Murcia, Ramón Luis Valcárcel, ha informau hue que a suya comunidat demandará a l’estau un rescate ta la suya deuda de 300 millons d’euros.

Valcárcel ha dito que aspera que ta setiembre a quantidat de diners solicitada ya siga disponible ta poder concarar os pagos de Murcia en deuda, seguntes la entrevista que l’ha feito o diario murciano La Opinión. En a entrevista, Valcárcel tamién asegura que ye dificil achiquir o deficit murciano d’o 4,4% dica 1,5% que se desiche, porque seguntes o president murciano, “a Comunidat de Murcia no tien ingresos”.

Murcia, con gubiernos d’o PP dende 1995, con Valcárcel como president, ye a segunda comunidat que anuncia que s’acubillará en o programa contra la deuda autonomica que anunció o gubierno espanyol. A primera estió Valencia, o zaguer viernes, que quan anunció a suya intinción, fació puyar a prima de risque espanyola dica un maximo historico y cayer a bolsa de Madrit.